Alisa to lwonik

Unves opa shuki ela fo pren a garden:

Imajini ba, in kloka to jagiser! Ela he en-yao jan kwo fai tik-tak oltaim. Ela en-yao tanto gro ke ela ofni wandakin pa bakkapak e tuy geti inen, miden oli sey syao dentarada e pruja. Also ela majbur salti oltaim fon un dentakin a otre-la fo bu tabahi inen oli sey jatile mekanisma ke zai oltaim virti e fai “tik-tak”.

Ver ya, ela lwo rek inu botela kun akwa! Ela majbur gro muvi gambas a braches fo bu droni. Pa fortuna pa saif, al bi in Sperlonga, ela lerni-te swimi.

Bat pa sey ves Alisa bu jawabi. Ela bu mog jawabi. Al wandi pa kukishamba ela he ek-kan yoshi inu tiriboxa wo ye tablakovras e servetas. Ela ek-kan e tuy lwo inu it. Servetas es aika mole, ewalaa Alisa en-somni on li. Koywan go pas e mah tiriboxa inu. Hu mog-te gesi ke Alia es inen? Al en-jagi ela vidi ke olo es ga tume sirkum. Yedoh ela ga bu en-fobi. ELa gwo lwo inu woshi-stanka, e dar bin iven pyu tume.

“Sun oni ve bepon table fo sabahfan, - Alisa dumi. – Li ve sertem nidi table kovra, ofni tiriboxa e tuy findi me.”

Bat hu mog dumi om sabahfan, si Alisa fa-wek? Pa sabah elay patra e mata lai, en-shatami a opa e oma:

Oni ya kisi e embrasi el agro afte findi in tiriboxa. E kwo om Alisa? Ela tuy utilisi situasion fo lwo inu posh de papa-ney jaketa. E duran ke oni tiri ela aus, ela pai fa-gande bay tinta por ke ela yao-te plei kun papa-ney bolkalam.