Alisa in Divalanda. Chapta 1

Alisa zai fa-tedi gro por sidi ga sin dela bli sista pa riva-sahil. Ela yo ek-kan sista-ney kitaba para ves, bat piktura e toka ambi yok, e “kwel haotaa ye pa kitaba” Alisa dumi “si it bu hev ni piktura, ni toka?”.

Also ela zai trai desidi (to bu es fasile por ke garmitaa mah ela gro-somnishil e nokway-dumishil) ob val gun en-stan e pluki kamila fo zwo kamila-kadena kel es ya hao kosa, wen Blan Kunila do rudish okos turan lopi pas bli ela.

To bu sembli tro strane. Alisa audi ke Kunila shwo “Ah, may boh, me zai tardi ya gro!”, bat to toshi bu mah ela tro astoni-ney. (Aften ela dumi om to e ek-samaji ke he treba fa-astoni, bat dan to olo sembli ya ga naturale.) Yedoh wen Kunila pren handakloka aus jilet-ney posh, kan it e hasti for, Alisa ek-stan kway, bikos turan fa-klare ke ela bu gwo vidi kunila kun jilet-ney posh ni kun handakloka ke oni mog pren aus toy posh. Also, por gran jan-yaosa, ela en-lopi afte ta tra felda e pai vidi ke ta plunji inu gran kunila-arda-dun bli barana.

Kunila-arda-dun un-nem es rekte fo kelke dao bat poy ek-turni nich, tanto turan ke Alisa hev ga nul taim fo probi stopi ewalaa ela findi swa lwo-she inu koy gro-glube kwan.Oda toy kwan es tanto glube oda lwoing es tanto lente, enikas ela hev ya basta taim fo idyen abyasi e trai gesi kwo sal eventi. Un-nem ela kan nich fo vidi a kwo ela zai lwo bat nichen es ga tume fo vidi enisa. Poy ela kan sirkum e merki ke ye mucho lemar e kitaba-tana pa oli taraf. Yoshi ye mucho mapa e piktura pendi-ney on pega. Al flai pas koy tana ela pren un glaska. It es labelen “oranja jem” bat pa afsos es vakue. Alisa bu pri idea tu mah-lwo toy glaska sikom ela fobi kili koywan nichen, also ela pai pon it inu ti ela lwo pas na lemar.

“Wel!” Alisa dumi “Afte tal lwosa tu lwo fon sulam ve bi nixa fo me. Pa dom li oli ve opini ke me es ya gro-kuraje! Es ya ke me wud shwo ga nul worda iven si me lwo fon dom-uupara!” (E to es ya probablem ver.)

Nich, nich, nich. Ob fin yok? “Me fai interes, kwanto milya me he yo tralwo til nau?” ela shwo lautem. “Shayad me es yo bli arda-sentra. Me remembi ba: es sirke char mil milya nich, shayad...” (es ke ela gwo lerni tal kosas pa skola e yao reveli suy jansa, obwol to bu es gro-hao kasu sikom nulwan mog audi.) “Oo ya, es ya korekte sifra – bat dan kwel es longituda e latituda ke me yo ateni? (Alisa hev ya nul idea om kwo es longituda e yoshi meno om kwo es latituda yedoh pri shwo tal gro-hao grave worda).

“Mogbi me sal tralwo arda totem!” ela shwo for. “To ve bi ya drole tu fa-aus miden jenta kel go al kapa nich! Li nami antipatas, bu ver...“ (nau ela joi por ke nulwan audi bikos to ga bu sembli korekte worda.) “Me ve majbur kwesti om nam de ley landa. Madam, bi karim jawabi, ob es Ostralia o Nyu Siland?“ (nau ela probi fai reveransa:  imajini ba reveransi al lwo – yu ve suksesi ku?) “Dan ela ve dumi ke me es nul-jannik. Non, tu kwesti bu es hao idea. Shayad ve gai findi skribitura koylok.”

Nich, nich, nich. Ye nixa fo zwo, also sun Alisa snova begin shwo. “Dina ve sinian om me pa aksham.” (Dina es elay kotina.) “Me nadi ke li bu fogeti mah-fule suy milka-pyata pa chay-taim. Ah, Dina, may kare, magari yu bi kun me! In aira maus yok, es ver, bat yu wud mog kapti watwat e to es hampi sama. Bat ob kota-ki chi watwat-ki?” Nau Alisa bikam aika somne e shwo for hampi somni-yen: “Ob kota-ki chi watwat-ki? Ob kota-ki chi watwat-ki?” e koyves “Ob watwat-ki chi kota-ki?” - sikom ela bu jan jawaba a ambi kwesta, es olosam fo ela, komo hi kwesti. Ela zai en-somni e begin sonji yo om to ke ela zai promeni kun Dina al hunten handas e zai kwesti ta gambirem “konfesi ba, Dina, ob yu gwo chi watwat?”  bat turan – laik pum! pum! - nichen ela es, on monton de suhe lif e brancha, e lwosa es pa fin.

Alisa senti ga nul tunga e en-stan tuy; ela kan uupar, bat uuparen ye sol tumitaa; bifoo ela ye un otre longe koridor e snova fliti figura de Blan Kunila kel lopi along it. Bu mog lusi taim: wek, afte ta! Alisa vidi ke ta turni angula shwo-yen “Ah, may aur-ki, may mustash-ki, fa ga tarde ya!”. Ela turni toshi, yus afte ta, ewalaa ta yok e ela es in longe nise shamba lumi-ney bay lampa-fila pendi-she fon tavan.

Ye mucho dwar pa oli taraf, bat oli es klosi-ney; afte go along ol shamba, un-nem avan e poy bak, e bu pai ofni nul dwar, Alisa tristem go pa mida al trai samaji ob ela ve mog fa-aus koytaim.

Ewalaa glas-tabla-ki do tri gamba: on it ye sol un tanike golda-klef. Alisa tuy dumi ke sey klef-ki shayad es fo koy dwar in shamba, bat afsos! - oda kufla-dun es tro gran, oda klef es tro syao, enikas Alisa bu pai ofni ga nul dwar bay it. Yedoh al snova go along shamba-mur ela ek-vidi un nise kurtena ke ela bu he merki bifooen. Baken it ye un syao dwar sirke shi-pet incha gao. Alisa trai ofni it bay golda-klef ewalaa it fiti al mah-joi ela gro!

Alisa ofni dwar e vidi ke it dukti inu syao koridor kel bu es pyu gran kem rata-arda-dun. Ela en-genui e kan tra koridor ewalaa dar ye zuy prival garden ke ela gwo vidi. Ela gro-yao ya fa-aus toy tume shamba e promeni miden toy kyares do yarke flor e toy lengish fontanes, bat ela bu mog iven mah suy kapa tra toy syao dwar; “e iven si me wud pai mah may kapa tra” - povre Alisa dumi - “ye nul utilitaa in kapa sin plechas... Oo, magari me mog fa-pligi kom teleskop! Shayad me wud mog hi si me wud jan komo begin.” Yu vidi, sikom tanto mucho gro-strane kosa he eventi yo, Alisa en-dumi ya ke muy shao kosa es verem noposible.

Semblem bu es utile tu weiti bli syao dwar, also ela go bak a tabla al haf-nadi findi on it koy otre klef o amini un lernikitaba fo lerni fa-pligi kom teleskop. Yedoh pa sey ves on it ye un botelakin (“kel sertem yok bifooen” Alisa shwo) kun papir-label ligi-ney pa suy galsa. On label ye wordas “PI ME” do gran jamile letra.

To es sertem muy interes-ney, bat saje Alisa-ki bu yao sekwi konsila pa hasta. “Un-nem gai fa-serte” ela shwo “ke skriba “toxin” hir yok”. Es ke ela gwo lekti kelke merkival historia om kindas kel es oda jal-ney oda chi-ney bay savaje animal oda fai-ney koy otre nohaotaa yus bikos li bu yao sekwi simple regula ke amigas he talimi a li: pa exampla ke nakali-ney gual-muver pa fin jal-wundi oni si oni teni it tro longem; e, si oni kati suy finga gro bay sikin, it pinchanem hemi; yoshi ela remembi hao ke, si oni pi mucho fon botelakin kun skriba “toxin”, es hampi serte ke pa fin oni senti swa kelkem morbe.

Yedoh pa sey botelakin skriba “toxin” yok, also Alisa kuraji gusti it e, al findi ke it gusti ya hao (do mixa de kirsa-pay, krem, ananas, rosti-ney kalkun, bonbon e garme tosta kun nayu), ela sun finpi it.

“Es ya strane senta!” Alisa shwo “Me kwasi zai fa-pligi kom teleskop”

Ewalaa to es ver: ela es nau sol shi incha gao. Alisa dumi tuy ke nau ela mog ya zin toy prival garden tra syao dwar e sey duma mah ela joi gro. Yedoh un-nem ela weiti duran kelke minuta fo samaji ob ela sal simti yoshi pyu: to mah ela idyen nokalme, “bikos pa fin” Alisa shwo a swa “me mog ga fa-wek, kom kandela. Es interes-ney ya, kwo me wud simili dan?” E ela probi imajini, kwo flama de kandela simili afte ke kandela es fuki-ney of, bikos ela bu remembi vidi tal kosa koytaim bifooen.

Duran kelke minuta nixa eventi, also Alisa desidi go inu garden tuy, ewalaa pa gro-afsos, al lai a dwar, ela findi ke golda-ney klef resti on tabla, e al lai bak a tabla, ela findi ke ela ga bu mog ateni it. Ela mog ya vidi it klarem tra glas, e ela gro-trai klimbi uupar un tabla-gamba, bat glidi nich; pa fin, ga fatigi-ney por traisa, ela en-sidi e en-plaki gro.

“Basta, yu pai ga nixa bay plaking!” Alisa shwo a swa, aika striktem. “Me konsili ke yu stopi tuy!” Ela sempre fai muy hao konsila a swa (obwol ela rarem sekwi li), e koytaim ela shatami swa til larmas; e unves ela iven probi slapi swa-ney wangas por juling in kroket-geim ke ela plei kontra swa. Sey drole kinda pri semblisi ke ela es dwa persona pa same taim. “Bat nau bu es utile” povre Alisa dumi “tu semblisi ke me es dwa persona, nau ya bu ye basta me iven fo un hi persona!"

Sun ela merki ke sub tabla ye un syao glas-boxa; Alisa ofni it e findi un syao kek, on kel ye worda “CHI ME”, jamilem skriben bay suhvinberi. “Hao, me sal chi it” Alisa shwo. “Si it mah me pyu gran, me ve mog ateni klef; si it mah me pyu syao, me ve mog kripi sub dwar; also me ve mog geti inu garden pa ambi kasu e es egale fo me kwel-la eventi!”

Ela chi idyen e shwo a swa nokalmem “Pyu gran o pyu syao? Pyu gran o pyu syao?” al pon handa on kapa fo senti ob ela fa-syao o fa-gran. Yedoh ela resti do same sais e to astoni ela gro. Sertem, wen oni chi kek, oni pinchanem resti do same sais; bat Alisa he yo tanto abyasi ke sol nopinchan kosa eventi ke normale jiva-going sembli a ela ya tedi-she e stupide.