Alisa in Divalanda. Chapta 8

Bli garden-zinsa ye un gran rosa-baum; ti zai kresi on it na rosas es blan, bat ye tri gardenyuan kel zai mangi pinti li rude. Alisa dumi ke es ya muy kuriose dela e lai pyu blisem fo kan; yus al lai ela audi ke un de li shwo: "Chauki ba, Petka! Bye pleski-pleski pinta an me tak!"

"To bin sin yao," Petka shwo glumem, "Semka ek-pushi may kuda!"

"Pyu hao yu bye shwo!" Petka ek-krai. "Me he audi ke Regina shwo yus yeri ke oni gai dekapisi yu!"

"Bu es yur dela, Dwaka!" Semka shwo.

"Doh, es suy hi dela!" Petka shwo, "e me ve expliki -  es por bringi tulipa-bulba inplas luk."

Semka mah-lwo brash. "Wel, fon oli nojustika es ya zuy..." – ta en-shwo bat stopi al ek-vidi Alisa kel zai stan kan li. Otre-las toshi turni swa, e li oli ek-pokloni gro.

"Plis, ob yu wud mog expliki a me," Alisa shwo idyen timidem, " way yu zai pinti sey rosas?"

Petka e Semka shwo nixa, yedoh kan an Dwaka. Dwaka en-shwo kyetem: "Wel, pa fakta, yu samaji ku, mis, sey baum mus-te bi rude rosa-baum, bat nu he galti-planti blan-la. Si Regina en-jan, oni ve dekapisi nu oli, es ver ya. Also yu vidi ya, mis, nu eforti gro bifoo ke ela lai..." Ewalaa Petka kel zai kan nokalmem tra garden, krai "Regina! Regina!", e tri gardenyuan tuy mah swa lwo platem on arda al fas nich. Ye gro-ney stepa-suon, e Alisa turni swa kun jigyas: ela yao vidi Regina.

Avanen zai go shi soldata kun koy sorta de piki-arma; oli do same forma kom tri gardenyuan, rektangule e plate, do handas e pedas pa angulas. Poy ye shi kortayuan; ley klaida hev ornamenta do kroses, e li go po dwa, kom soldata. Sekwem ye rega-kinda: shi wan kel lai al salti-salti alegrem; li go pa para al teni handas de mutu, e oli hev ornamenta do kordias. Poy ye gastas, maiste de li es Rego o Regina. Miden li den Blan Kunila Alisa rekoni: ta zai shwo hasti-shem e nerva-nem al smaili a oli, e go pas sin merki ela. Poy lai Valet do Kordia, kel zai porti Rego-ney krona on yarke-rude kushen do bahmal. E pa fin de ol gran prosesion ye REGO E REGINA DO KORDIA.

Alisa en-hesiti: mogbi ela toshi gai en-lagi on arda al fas nich, kom tri gardenyuan? Bat ela semblem bu gwo audi om tal regula al prosesion. "E krome to, do kwel utilitaa prosesion wud bi", ela dumi, "si oli mus lagi al fas nich e bu mog vidi nixa?" Also ela sim resti stan, weiti-yen.

Wen prosesion blisifi a Alisa, li oli stopi e kan ela, e Regina shwo saktem: "Hu es sey-la?" Ela he adresi valet do Kordia, bat ta sol pokloni e smaili kom jawaba.

"Idiota!" Regina shwo al ek-sheiki kapa nosabrem. Poy ela turni swa a Alisa, shwo: "Komo yu nami, kinda?"

"Me nami Alisa, yur Mahantaa," Alisa shwo muy latifem; bat adi a swa: "Wel, li es ya sol pleikarta-seta. Bu treba fobi li!"

"E hu es sey-las?" Regina shwo al indiki tri gardenyuan kel zai lagi sirkum rosa-baum. Sikom li zai lagi al fas nich e al bey uupar, e sikom bey-ornamenta es same she oli in seta, ela bu mog samaji ob li es gardenyuan oda soldata oda kortayuan oda tri de elay prope kinda.

"Way me gai jan?" Alisa shwo a fa-surprisi por swa-ney kuraja. "Bu es may dela."

Regina fa-yarke-rude por furia, kan ela fixem kom savaje bestia duran kelke taim, poy en-krai gro "Haki los elay kapa! Haki los..."

"Pumbika!" Alisa shwo muy lautem e desidi-nem, ewalaa Regina silensi.

Rego pon handa on elay plecha, shwo timidem: "Atenti ba, kare: ela es sim kinda!"

Regina ira-nem wekturni swa fon ta e shwo a Valet: "Turni li sirkum!"

"En-stan ba!" Regina skwili-shwo lautem, e tri gardenyuan tuy ek-salti-stan e begin pokloni a Rego, Regina, rega-kinda e oli otre.

"Kwiti ba se!" Regina krai. "Me fai vertiga por yu." Poy ela turni swa a rosa-baum, shwo: "Kwo yu zwo-te hir?"

"Oo, Yur Mahantaa," Dwaka shwo muy namrem al genui pa un gamba, "nu trai-te..."

"Me samaji!" Regina shwo: ela he examini rosas pa intertaim. "Haki los ley kapas!" E prosesion en-muvi for, al ke tri soldata resti fo morta-puni gardenyuanes to nofortunnik, kel tuy lopi a Alisa fo gei protekti.

"Yur kapas bu ve bi haken los!" Alisa shwo e pon li inu bli-ney gran flordan. Tri soldata shuki-wandi duran para minuta e poy en-marshi afte prosesion.

"Ob ley kapas es los?" Regina krai-kwesti.

"Ley kapas es wek, Yur Mahantaa" soldatas krai-jawabi.

"Es ya hao!" Regina krai. "Ob yu janmog plei kroket?"

Soldata silensi e kan Alisa, sikom evidentem den ela Regina he adresi.

"Ya!" Alisa krai.

"Dan kamon!" brai-krai Regina, e Alisa hunti a prosesion al trai gesi kwo eventi sekwem.

"Es .. es ya muy hao dey!" koy timide vos fa-audi bli: Blan Kunila zai go flanken al kan-kan elay fas nokalmem.

"Ver, muy." Alisa shwo. - "Wo es Dukina?"  "Shsh! Shsh!" Kunila hasti-shwo kyetem. Ta nokalmem ek-kan bak sobre plecha, poy fa-lifti on pedafinga, mah-blise muh a Alisa-ney aur, hamsi: "Ela es kondamnen a morta."

"Por kwo?" Alisa kwesti.

"Ob yu he shwo 'Es pitival!'?" Kunila shwo.

"Ga non," Alisa shwo. "Me bu dumi ke se es pitival. Me he shwo 'Por kwo?'"

"Ela darbi-darbi Regina-ney aures..." Kunila en-shwo. Alisa ek-krai to ridi. "Oo, shsh!" Kunila hamsi fobi-shem. "Regina ve audi! Es ke ela tardi, e Regina he shwo..."

"Okupi ba swa-ney plasa!" Regina guruhi-krai, e jenta en-lopi a oli direksion al kalabi kontra mutu; yedoh olo ladi afte para minuta, e pleisa begin.

Alisa ek-dumi ke ela bu gwo vidi tanto kuriose kroket-maidan in tote jiva. Ye mucho tudun e fora, kroket-boles es yoja, hamras es flamingo-faula, e soldatas plei ruola de arka – li pligi swa e stan on handas e pedas.

Un-nem shefe mushkilitaa fo Alisa es tu duyfu flamingo: ela pai lerni mah-geti suy korpa sub bracha (es ya basta byen), al ke suy gambas pendi, bat pa maiste kasu afte ke ela pai rektisi suy galsa e sal darbi yoja bay suy kapa, ta kurvi swa uupar e kan elay fas bay okos tanto perplexe, ke ela majbur ek-lwo in ridi; e afte ke ela pai mah-geti suy kapa nich snova, ela fa-vexi por findi ke yoja he devolvi e zai kripi wek. Krome se olo, ye tudun o fora pa kwel unkwe direksion ke ela darbi-sendi yoja, yoshi pligi-ney soldata oltaim en-stan e go wek a otre parta de maidan, also sun Alisa konklusi ke sey geim es verem gro-mushkile.

Alisa fa-alarmi. Obwol ela haishi bu he fai eni disputa kun Regina, ela ya jan ke se mog eventi pa eni minuta, "e dan", ela dumi, "kwo eventi an me? Hir oni gro-pri haki kapas los; es ya diva ke haishi ye koywan jivi-she!"

Ela kan-shuki koy eskapi-dao e mediti ob ela mog fa-wek sin gei merki, ewalaa koysa strane apari in aira. Un-nem it mah-perplexe ela gro, bat afte observi it duran para minuta, ela samaji ke es smaila e shwo a swa: "Es Chesher-Kota: also me sal hev koywan fo kunshwo."

"Komo yu sta?" Kota kwesti tuy afte ke muh en-ye basta fo shwo bay it.

Alisa weiti til ke okos apari e poy niki. "Tu shwo a ta bu hev sensu," ela dumi, "til ke aures apari, amini un-la." Afte un minuta tote kapa apari, dan Alisa pon nich suy flamingo e begin rakonti om geim al joi gro por ke ye koywan kel slu. Kota semblem dumi ke nau ye basta de ta in vida, e nulsa de ta bu apari pyu.

"Me opini ke li bu plei justem," Alisa en-shwo aika shakwi-shem, "e li kwereli tanto gro ke oni bu mog audi swa selfa al shwo... e li semblem ga bu hev nul regula; amini, si regula ye, nulwan atenti li... e yu shayad bu imajini komo es konfusi-she wen oli kosa es jivi-she: pa exampla, ti me mus trago na arka zai promeni pa otre taraf de maidan... e me yus mog-te kroketi Regina-ney yoja, bat ta he lopi wek al vidi ke may-la lai!"

"Ob yu pri Regina?" Kota kwesti kyetem.

"Ga non," Alisa shwo, "es ya tanto extremem... " Yus al shwo se, ela merki ke Regina zai go bli baken ela al slu; also ela shwo for: "...probable ke ela ve jiti, ke apena val fini geim."

"Kun hu yu zai toki?" Rego shwo al lai a Alisa e al kan Kota-ney kapa gro-jigyas-nem.

"Es may amiga - Chesher-Kota" Alisa shwo. "Lasi me prisenti ta."

"Me ga bu pri komo ta aspekti," Rego shwo, "yedoh ta darfi kisi may handa si ta yao."

"Bu yao," Kota remarki.

"Bye naglefai," Rego shwo. "E bye kan me tak!" Lu ahfi swa baken Alisa al shwo.

"Iven kota darfi kan rego," Alisa shwo. "Me remembi lekti sey shwotura in koy kitaba".

"Non, oni mus mah-wek ta," Rego shwo muy desidi-nem e voki Regina kel zai go pas: "May kare! Magari yu mah sey kota wek!"

Regina hev sol un dao fo resolvi eni mushkila, syao o gran. "Haki los suy kapa!" ela shwo sin iven turni swa fo kan.

"Me sal mah-lai morta-puner pa selfa," Rego hasti shwo e tuy en-go wek.

Elay yoja zai batali kun otre yoja. To sembli gro-hao shansa fo kroketi un de li bay otre-la; sole mushkila es ke elay flamingo he go a otre taraf de garden, e Alisa vidi komo ta sinsukses-nem zai trai flai uupar on baum.

Afte pai kapti flamingo e bringi ta bak, ela vidi ke batala es finen e ambi yoja yok. "Bat se ya bu muhimi," Alisa dumi, "sikom oli arka toshi he go wek fon sey maidan-taraf." Also ela pon ta sub bracha fo ke ta bu mog eskapi snova, e go versu swa-ney amiga to Kota fo toki idyen pyu.

Al lai bak a Chesher-Kota, ela fa-surprisi por findi aika gran trupa sirkum ta. Zai ye disputa inter morta-puner, Rego e Regina, kel shwo pa same taim, al ke oli otres silensi e aspekti sta muy nobyen. Tuy afte ke Alisa lai, ela gei apeli bay li tri fo ke ela resolvi problema. Li zai repeti swa-ney argumenta fo ela, bat es ya muy mushkile tu samaji kwo exaktem li shwo, sikom li oli shwo pa same taim.

Alisa bu mog inventi nixa krome: "Kota perteni a Dukina, also kwesti ba ela hi."

"Ela es in prison," Regina shwo a morta-puner: "Mah-lai ela ahir." Ewalaa morta-puner ek-fai wek kom flecha.

[[Alisa in Divalanda. Chapta 9|Chapta 9]]