Kan sursa

He treba mucho taim fo ke me samaji, fon wo lu lai. Syao prinsa fai mucho kwesta a me, bat pa sembla bu audi may-las. Es por kasuale worda ke olo shao-po-shao gei reveli a me. 

Tak, wen lu pa un-ney ves vidi may avion (me bu ve rasmi may avion, es tro mushkile fo me), lu kwesti:

— Kwo es sey kosa?

— Bu es kosa. It flai. Es avion. May avion.

E kun garwitaa me expliki a lu, ke me flai. Dan lu ek-krai:

— Kwo? Also yu lwo-te fon skay?

— Ya, — me shwo namrem.

— Ah! Es drole...

E syao prinsa ridi gro-alegrem, lo kel vexi me. Me yao, ke oni trati may mushkila seriosem. Poy lu adi:

— Also, yu toshi lai fon skay! Fon kwel planeta yu es?

"Walaa jawaba a enigma", me dumi e kwesti tuy:

— Also yu lai fon otre planeta, bu ver?

Bat lu bu jawabi. Lu idyen sheiki kapa al kan may avion:

— Wel, bay sey-la oni bu mog lai fon muy dale.

E lu en-mediti fo longtaim. Poy lu tiri aus posh may yan e en-kontempli suy tresor.

Imajini ba, komo me es intrigi-ney bay sey haf-konfesa om "otre planetas". Also me trai en-jan pyu:

— Fon wo yu lai, may boy? Wo es yur dom? A wo yu yao pren may yan?

Afte mediti idyen, lu jawabi:

— Es muy hao, ke yu he dai boxa a me. In nocha it ve servi kom dom fo ta.

— Sertem. E si yu suluki hao, me ve dai a yu yoshi korda fo ligi ta al dey. E staka-ki.

Sey proposa sembli shoki syao prinsa.

— Ligi ta? Es ya strane idea.

— Bat si yu bu ligi ta, ta go a koylok e fa-lusi...

May amiga snova ridi alegrem:

— A wo, yu dumi, ke lu mog go?

— A enilok. Rektem avan.

Dan syao prinsa shwo seriosem:

— Es nixa, es ya syao she me.

E lu adi, idyen tristem: 

— Rektem avan oni bu mog go muy dalem...

[[File:09syaoprinsa.jpg]]


----


* [[Syao Prinsa. Chapta 4]]

* [[Syao Prinsa|Kontena]]