Kan sursa

Pet-ney planeta es muy kuriose. Es zuy syao. Dar ye plasa yus fo un fanus e un fanusyuan. Syao prinsa bu mog samaji, way oni nidi fanus e fanusyuan on syao planeta koylok pa skay, wo bu ye ni dom ni jen. Yedoh lu dumi:

"Mogbi sey jen es absurde. Bat ta es meno absurde kem rego, gamandenik, bisnesjen e pyannik. Amini suy gunsa hev sensu. Wen ta lumisi suy fanus, es kwasi yoshi un stara o yoshi un flor janmi. Wen ta tushi suy fanus, es kwasi ta mah flor o stara en-somni. Muy jamile zunsa. Es verem utile, por ke es jamile."

[[File:29syaoprinsa.jpg]]

Al ke lu lai a planeta, lu saluti fanusyuan kun respekta:

— Hao dey! Way yu yus he tushi fanus?

— Es instrukta, — fanusyuan jawabi. — Hao dey.

— Kwel es instrukta?

— Es tu tushi fanus. Hao aksham.

E ta rilumisi it.

— Bat way yu yus he lumisi it snova?

— Es instrukta, — fanusyuan repeti.

— Me bu samaji, — syao prinsa shwo.

— Bu ye nixa fo samaji. Instrukta es instrukta. Hao dey.

E ta tushi fanus.

Poy ta waipi frenta bay poshtuh do rude kwadra.

— Es gro-mushkile zunsa. Bifooen se bin rasum-ney. Me gwo tushi pa sabah e lumisi pa aksham. Me gwo hev resta de lumadey fo reposi e resta de nocha fo somni...

— E poy instrukta he shanji?

— Instrukta bu he shanji, — fanusyuan shwo. – Se hi es problema! May planeta turni pyu e pyu kway fon yar a yar, bat instrukta es same.

— Also? — syao prinsa shwo.

— Also nau, wen it fai un turna per un minuta, me bu hev nul sekunda fo reposi. Me tushi e lumisi kada minuta!

— Es drole! Dey she yu duri un minuta!

— Totem bu es drole, — fanusyuan shwo. —Nu kunshwo yo mes.

— Tote mes?

— Ya. Trishi minuta. Trishi dey! Hao aksham.

E ta rilumisi fanus.

Syao prinsa zai kan ta e en-lubi sey fanusyuan, kel es tanto fidele a instrukta. Syao prinsa remembi, komo lu gwo tiri stula, dabe kan suryalwo. E lu en-yao helpi suy amiga:

— Audi ba... me jan, komo yu mog reposi wen yu yao.

— Me sempre yao, — fanusyuan shwo.

Por ke oni mog bi fidele e lan pa same taim.

— Yur planeta es gro-syao, — syao prinsa kontinu, — yu mog go sirkum it bay tri gro-stepa. Yu gai simplem go aika lentem, dabe sempre resti sub surya. Wen yu en-yao reposi, yu simplem go... e lumadey duri tanto kwanto yu yao.

— Wel, se bu helpi gro, — fanusyuan shwo. — To ke me pri zuy gro es tu somni.

— Es buhao, — syao prinsa shwo.

— Es buhao, — fanusyuan shwo. — Hao dey.

E ta tushi fanus.

"Walaa jen, — syao prinsa dumi al kontinu luy safara, — jen kel wud gei norespekti bay otre-las: rego, gamandenik, pyannik, bisnesjen. Yedoh ta es sole kel bu sembli ridival a me. Mogbi, es por ke ta zun koysa otre kem ta selfa."

Lu sospiri kun afsos e dumi: 

"Ta es sole kun kel me wud mog fai amigitaa. Bat suy planeta es verem syao. Plasa fo dwa jen yok..."

Syao prinsa bu osi konfesi a swa, ke lu afsosi om sey blesi-ney planeta primem por mil charsto- charshi suryalwo per dwashi-char ora!



----


* [[Syao Prinsa. Chapta 15]]

* [[Syao Prinsa|Kontena]]