Kan sursa

'''Investiga de avion-krusha in Yaroslavl es finen'''

Dey 2 mes 11 yar 2011 Interstata-ney Avion-ney Komitee (IAK) in Moskva deklari ke pilotas hi es kulpa-ney om ti eventi pa dey 7 mes 9 na avion-krusha in kel 44 jen tabahi. Avion Yak-42 krushi tuy afte en-flaisa, kili-yen tote fama-ney hokey-tim Lokomotiv. Sol un jen, avion-ney injenior, ausjivi. Segun IAK, un oda ambi pilota ouran (kasualem) presi brek-pedal duran en-flaisa. Por to avion bu mog ateni treba-ney kwaytaa, flai sol kelke stoka metra e poy lwo on arda. Ti presi brek-pedal na kausa mog bi to ke ambi pilota maistem gwo flai un otre tip de avion, nami-yen Yak-40. In Yak-42, kom in hampi oli nau-ney avion de munda, pilota ruli avion bay presi niche parta de pedal e breki bay presi it-ney uupare parta, bat in Yak-40 es otrem. Regulatot demandi ke pilota de Yak-42 pon topuk on poda de kabina, bat Solomentsev e Jevelov bin abyasen a Yak-40 e lasi swa-ney peda resti on pedal. Yoshi un li-ney galta es ke li bu desidi stopi avion pa hao taim, obwol ye-te indika, ke prosesa de en-flaisa bu go normalem.

[[Category:Lo diverse]]