Kan sursa

{{Edita}}

Audi ba!

Si oni lumisi stara,

also - koywan den to treba?

Also - koywan yao ke li ye?

Also - koywan nami sey spuka-ki

perlinka?


E al gro-eforti,

tra storma de middey polva

ta ek-zin dom de boh,

fobi ke ta es tarde,

plaki,

kisi suy jilaful handa,

pregi -

zaruu treba stara! -

kasami -

ta bu trajivi sinstara-ney griva!

Poy

ta go-go,

sta nokyete,

bat fon ausen kalme.

Shwo a koy jen:

"Nau yu sta ya hao?

Bu fobi?

Ver?!"


Audi ba!

Si oni lumisi stara,

also - koywan den to treba?

Also - oni den to nidi,

ke kada aksham

sobre ruf

en-lumi vaika un star'?!


''Vladimir Mayakovski''


[[Poema|Kontena]]
[[Category:Poema]]