Kan sursa

{{Edita}}

[http://lidepla.esy.es/node/106 "Ana Pana pa lidepla" pa Lideplandia kun suon e tamrin]


== Parta 1. - Salam! ==

Salam!

Me nami Ana Pana. May nam es Ana. May familianam es Pana.

Me jivi in Nyu York, USA. May adres es: 1234 Longe-gata.

May e-meil-adres es: ana@lidepla.org. ''(@ - akauda)''

Me hev 18 (shi-ot) yar.

Komo yu nami? Wo yu jivi?

Swasti!


== Parta 2. - Om Ana ==

Pa piktura ye un gela. Ela nami Ana. Elay fule nam es Ana Pana.

Ana es yunge. Ana hev 18 (shi-ot) yar.

Adres de Ana es: 1234 Longe-gata. E-meil-adres de Ana es: ana@lidepla.org.

Ana jivi in Nyu York. Nyu York es urba in USA.

USA es landa in Amerika. Amerika es munda-parta.

In munda ye pluri munda-parta, pa exampla: Amerika, Afrika, Asia, Europa e Oseania.


== Parta 3. - Familia ==

Walaa may familia!

In may familia ye 5 (pet) jen. Es me, may mata e may patra. Me hev yoshi un brata e un sista. Also me hev 2 (dwa) brata-sista. Li es pyu yunge kem me. May mata es zuy lao in nuy familia.

May mata-patra posesi un flat. In toy flat nu jivi. In flat ye 4 (char) shamba.

May brata e sista jivi in un shamba e me jivi in otre-la.

May brata e sista simili gro. Li es ya twin. May sista hev 12 (shi-dwa) yar. 

Kwanto yar may brata hev? Toshi shi-dwa. Twin sempre hev ya same yash :-).


== Parta 4. - Hobi ==

Ana pri gani. Ela gani oftem. Ela janmog gani ya hao! Tu gani es elay hobi.
Yoshi ela pri plei tenis e raki bisikla. Also, Ana es i musiknik i sportnik!
Ana yoshi pri lekti kitaba e kan kino.

Brata e sista de Ana oftem swimi. Li gro-pri plei in akwa.

Hobi de Ana-ney mata es tu lerni lingwas. Ela yo shwo hao pa 7 (sem) lingwa!

Patra de Ana bu pri lerni nove lingwas. Luy hobi es kuking. Lu kuki maistem legum, bat koyves lu kuki yoshi fish.


== Parta 5. - Meteo ==

Nau es hima in Nyu York. Zai pluvi... Yeri snegi e sedey pluvi. Hao meteo fo bi she me pa dom... Also me zai lekti kitaba. Me nadi ke manya ye surya, bikos dan me ve raki bisikla kun may amiga. Faktem me pri saif pyu kem hima. Pa saif meteo es oftem garme she nu, hir, in USA. Me gro-pri wen ye surya! Sirke 25 gradus do Selsyus (77 gradus do Farenhait) es perfekte, segun me. Fo me es tro garme wen ye surya e temperatura es pyu kem 30 gradus do Selsyus (86 gradus do Farenhait). 

Afte saif es priate wen oton lai kun freshe aira e idyen pluva. E afte hima es priate wen vesna lai kun pyu warme meteo. Farka es hao... Magari surya lai!



== Parta 6. - Studa ==

Es may laste yar bifoo ke me mog studi pa universitet. Es idyen mushkile tu samaji kwel fah me wud yao studi... Yoshi pyu mushkile es tu samaji to, jen do kwel profesion me wud yao bikam! Programer ku, o talimer ku, o jurnalista ku? Mogbi me ve yao bikam leker, si me suksesi zin toy universitet. Al nau may fenshu bu es basta hao, bat me trai studi muy lagan-nem. 

Yoshi me dumi ke wud bi hao tu fai pausa pa studing fo kelke taim. Wud bi muy interes-ney tu safari pa farke landa e en-jan nove kultura! Bat to kosti mucho, e me bu jan komo akwiri tanto mani... Yoshi tu studi pa universitet kosti mucho, bat may mata-patra es tayar fo pagi pur to. Tu findi gunsa es muy mushkile, also me studi zuy probablem pa lai-she yar... Bat kwel fah?


== Parta 7. - Longe safara ==

Koytaim bak me hev longe e muy interes-ney safara kun may amiga. Un-nem nu raki tren til airaportu. Poy nu flai duran 11 (shi-un) ora! Al arivi nu es ga fatige bat muy joisaful! Nu treba fai longe fila fo diki nuy pasporta e visa. Cheka pasi sin problema. Pa fin nu es in Beizin, shefurba de Jungwo, - es ya astonival gro-urba! Por koy kausa nuy Jungwo-amigina bu miti nu in airaportu. "Kwo zwo?" me dumi. Mucho jen krai "Taxi, taxi?!" Sikom bus yok, nu desidi go bay taxi.

Nu diki adres a un taxi-shofer e lu latifem helpi nu om bagaja. Pa nofortuna nu bu samaji to ke lu shwo e lu bu samaji nu... Afte hampi un ora in taxi nu arivi e nuy amigina saluti nu kun gran smaila. Fa-reveli ke ela bu he mog lai a airaportu bikos elay brata-ki morbi idyen e elay mata-patra es pa gunsa.
Oo, nu pasi-te verem hao taim in Beizin kun may amigas! Dar olo bin gro-interes-ney! Koytaim me wud yao snova go adar... 


== Parta 8. - Lingwas ==

Me fai interes om lingwas. Me bu pri lerni nove lingwa. Bat me joi al audi ga garibe lingwa. Me opini ke evolusion hi de lingwas es interes-ney. Me he audi ke ye pyu kem 2000 (dwa mil) lingwa pa arda sedey. Kelke lingwa morti sun e kelke nove apari. E hampi kada lingwa evolusioni. Wen me bin in Jungwo me trai lerni kelke worda pa Jungwo-lingwa. Bat me tuy fogeti li. Fo me Jungwo-lingwa es muy jamile, bat yoshi gro-mushkile... E fo Jungwo-jen may lingwa hi es muy mushkile.

Kelke jen in Jungwo trai shwo kun me pa inglish, bat tu samaji li es mushkile. Ley pronunsa es terible. Yedoh es mucho pyu hao kem may Jungwo-lingwa pronunsa! Pa fortuna ye helpalingwa: pa exampla esperanto e lidepla. May Jungwo-amiga shwo pa lidepla. Me es yo toshi lidepla-shwoer. Pa sey lingwa nu mog komuniki hao. Nu oftem skribi a mutu e chati pa internet. Semblem un helpalingwa e internet es perfekte para fo komuniki kun jen pa ol munda fasilem e kway!



[[Ana miti...|Kontinusa: Ana miti...]]