Kan sursa

http://youtu.be/wQ3QndKvTvA


Unves ye un syao regilanda sirkum lak.

Pa un garme saif pluva ga yok e lak fa-suhe.

Jenta alarmi, lai a rega.

"Longtaim yo pluva yok. Nuy felda fa-vakue!" agra-yuan shwo.

"Fish fo kapti-vendi yok. Komo jivi?" fisher kwesti.

"Salvi ba nu fon sey disasta, oo karim rega!" gina shwofu al ke kinda plaki por pyasa.



Rega sendi char general a oli char direksion fo shuki akwa.

Un-ney general go a esta, versu suryachu,

dwa-ney a suda, versu garme ramla,

tri-ney a westa, versu suryalwo,

e char-ney go al sekwi Norda Star.



Li shuki duran dey e nocha, hir e dar, uuparen e nichen.

Li shuki kadalok bat sin sukses.

Tri general lai bak al vakue handas.

Bat un general, toy-la kel he go a norda, resoluti bu mah-fali swa-ney rega. Ta wandi longtaim e pa fin lai a un lenge monta-vilaja.

Al ke ta en-sidi bli monta-nicha un laogina lai en-sidi bli ta.

General indiki horisonta, shwo:

"Me lai fon jamile regilanda wo pa tote yar pluva he yok. Ob yu mog helpi findi akwa?"

Laogina shwo ke gai sekwi ela, e go uupar monta, poy inu guha.

"In nuy landa nu toshi bu hev akwa," ela shwo.

Poy indiki aiska in guha, adi: " Nu nami se ais. Pren pes ais, e in yur regilanda oni ve neva pyasi snova."

General rupti-pren un gran aiska, pon it inu gari e hasti a dom.



Wen lu ateni dom toy gran aiska es tau-ney inu un syao ais-pes.

Nulwan in palas gwo vidi ais bifooen, also oli kan it al gro-astoni.

"Shayad es akwa-semena!" un minista exklami turan.

Rega komandi ke oni semeni it tuy.

Al ke agrayuan kavi arda, ais-pes fa-syao for por surya.

Li pon it kway inu yama, bat it fa-wek bifoo li pai kovri it bay arda.

Agrayuan konfusi-alarmi gro. Li kavi-shuki toy magike semena pyu e pyu glubem, til ke nocha lai.



Al savera rega lai e vidi ke oli agrayuan zai somni sirkum yama. Lu kan inu por jigyas e ek-krai por astona:

"En-jagi ba, may hao jen, akwa-semena ankuri yo! Nichen ye akwa!"

Tak hi un-ney kwan en-ye.