Kan sursa

Oo syao prinsa! Shao-po-shao me he samaji yur melankolike jiva. Duran longtaim yu hev-te kom amusa sol charma de suryalwo. Me he en-jan sey nove detal in char-ney sabah, wen yu shwo: — Me pri suryalwo. Nu go ba kan surya kel lwo... — Bat treba weiti... — Weiti kwo? — Weiti ke surya lwo. Un-nem yu sembli surprisi-ney, poy yu ridi om yu selfa, shwo: — Me sempre dumi ke me es she me! Ver. Wen es middey in USA, surya — oli jan — yo lwo in Frans. Si oni wud ateni Frans in un minuta, oni wud mog kan suryalwo. Afsos, Frans es gro-dale. Bat on yur planeta gwo sufi, ke yu tiri stula pa kelke stepa. E yu gwo kan suryalwo snova e snova, si yu yao... — Un dey me he kan suryalwo charshi-tri ves! E idyen poy yu adi: — Yu jan... wen es tanto triste, es hao tu kan suryalwo... — Also in charshi-tri-ves-ney dey yu bin gro-triste? Bat syao prinsa bu jawabi. (rasma de SP kan-she suryalwo) ---- * [[Syao Prinsa. Chapta 7]] * [[Syao Prinsa|Kontena]]

Return to Syao Prinsa. Chapta 6.