Kan sursa

Al yash de sit yar, unves me vidi un magnifike imaja in kitaba om virga-ney shulin kel nami "Reale historias". It prisenti boa-serpenta, kel zai gloti un savaje bestia. Walaa kopia de rasma. [[File:01syaoprinsa.jpg]] Oni shwo in kitaba: «Boa-serpenta gloti suy kaptura totem, sin chabi. Afte se ta bu mog muvi pyu e somni duran sit mes digesti-yen». Dan me mediti mucho om jangla aventuras. Pa may tur, me rasmi bay kolorkalam may un-ney rasma. May rasma numa Un. Walaa kwel it es: [[File:02syaoprinsa.jpg]] Me diki may rasma a adulte jenta e kwesti, ob may rasma fobisi li. — Way shapa mus fobisi? — oni jawabi a me. Bat may rasma bu prisenti shapa. It prisenti boa-serpenta, kel zai digesti elefanta. Also me rasmi lo inen de boa-serpenta, dabe adultas samaji. Li sempre nidi explika. May rasma numa Dwa es tal: [[File:03syaoprinsa.jpg]] Adultas konsili, ke me kwiti rasmi lo inen o lo ausen de serpentas e preferi fai interes om geografia, historia, kalkula e gramatika. Tak hi, pa yash de sit yar, me he abnegi briliante kariera de pikter. Fiasko de may rasma numa Un e de may rasma numa Dwa he desinspiri me. Adultas neva samaji enisa pa selfa, e sempre tu expliki olo a li mah kindas fatigi. Also me he mus selekti otre profesion e lerni piloti avion. Me gwo flai kelkem kadalok in munda. E geografia, ver, gwo servi gro a me. Me gwo mog pa un-ney kansa distinti Jungwo fon Arisona. Es muy utile, si oni he lusi dao duran nocha. Duran may jiva me gwo hev menga de kontakta kun menga de seriose jen. Me gwo jivi mucho she adultas. Me gwo vidi li ga blisem. Se bu he mah-hao gro may opina om li. Wen me gwo miti un de li, kel sembli a me idyen pyu do klare kapa, me gwo diki a ta may sempre kipi-ney rasma numa Un. Me yao jan, ob ta es verem samajishil. Bat oni sempre gwo shwo: "Es shapa". E me bu shwo kun ta ni om boa-serpenta, ni om jangla, ni om stara. Me adapti a suy nivel. Me shwo om brij, golfa, politika e tay. E toy adulta es santush por koni tal rasum-ney jen. ---- * [[Syao Prinsa. Chapta 2]] * [[Syao Prinsa|Kontena]]

Return to Syao Prinsa. Chapta 1.