Kan sursa

= Sunduk do marjen = Sertem me tuy rakonti olo ke me jan a mata. Shayad me iven gai-te zwo se longtaim bak. Nu findi swa in ga mushkile danjaful situasion. Parta de kapitan-ney mani, si ye mani, it sertem mus bi nu-ney. Yedoh bu es probable ke kapitan-ney ship-amigas, e primem toy-las ke me he vidi yo, Swate Doga e blinde vagabonder, wud yao losdai swa-ney kaptura fo ladi deba de morte wan. Den komanda de kapitan tu raki-go a Doktor Livsi tuy, me ga bu mog fulfil it, bikos me bu mog iven dumi om lyu mata sole, sin protekta. Bat nu bu mog resti pa dom toshi, sikom iven suon de gual-ge lwo-she on fer-grata e kloka-ney tiktaking mah nu alarmi. Nu semblem audi lai-she stepas fon kadalok. Ek-duma om ti zai lagi in salon na korpa de morte kapitan e om ti es ga bli e mog returni pa eni minuta na nafra-ney blinda, it mah may kordia gro-salti por dashat. Taim fo deri ga yok, e nu desidi pa fin ke nu pa hunta gai go a bli-ney vilaja fo shuki-voki helpa. Nu shwo, nu zwo. Sin kapakovra nu tuy lopi aus tra frosta-ney tuman al ke fa-tume. Vilaja es budale, obwol buvidibile, it loki pa otre taraf de sekwi-she baya; e me es gro-kurajisen bay to ke blinda he lai fon otre direksion e musbi he returni adar toshi. Nu bu go longtaim, obwol stopi koyves fo slu. Bat nopinchan suon yok, ye sol mar-bata-ney shum e karke gana-si de shulin-faula. Es yo kandela-taim wen nu ateni vilaja, e me ve neva fogeti komo toy hwan brila kuraji-kalmisi nu; bat fa-reveli ke to es ya sole helpa ke nu pai dar. Nulwan, kwel unkwe shama se es, konsenti go a "Admiral Benbo" kun nu tuhun. Kem pyu nu shwo om nuy beda, tem pyu oli fa-klingi a swa-ney mur. Ga oli: man, gina, kinda. Nam de Kapitan Flint, ke me haishi bu jan, bu es nove fo maiste jen dar, e mah oni dashati. Kelke jen en-remembi ke al gun pa agra budalem fon "Admiral Benbo" li vidi koy garibas; li dumi ke es kontrabander e hasti a dom. E amini un jen he vidi un bugran parus-ship in baya nami-ney Kitt-ney Dun. Also oni tremi-dashati iven al audi om kapitan-ney amigas. Kelke bravnik es tayar fo raki voki Doktor Livsi kel habiti pa otre direksion, but ga nulwan yao helpi nu om gastaguan-ney defensa. Oni shwo ke fobishiltaa mog infekti; bat, pa same taim, disputa mog mah-kuraji. Also afte ke kadawan shwo-refusi, may mata en-fai shwosa. Ela deklari ke ela bu sal lusi mani kel perteni a elay son to haf-yatima. - Si yu oli bu osi go, - ela shwo, - Jim e me osi go solem. Nu sal go bak pa same ti nu lai na dao. E shma-danke a yu oli to gran masbute man do yunkok-ney atma! Nu ve ofni toy sunduk, iven si nu majbur morti por se... Me ve danki yu, madam Krossli, si yu permiti ke nu pren sey yur bao, dabe bringi nuy kanun-ney mani. Sertem, me shwo ke me go kun mata, e li oli sertem krai ke es ya norasum-ney. Yedoh iven dan nulwan osi go akompani nu. Li dai a me sharji-ney pistola fo kasu de ataka, e li wadi hev tayar kavales fo kasu de persekwa; e se es olo ke li zwo. Yoshi un yungo raki-go fo voki doktor e fo pai armisen helpa. May kordia zai gro-bati al ke nu en-fai nuy danjaful dao pa toy lenge aksham. Fule luna zai begin fa-lifti; it zai rudefai tra tuman. Nu en-samaji ke sun fa-lumi kwasi pa dey, e nu ve mog gei merki bay eni oko. Also nu hasti yoshi pyu. Nu zai kripi-go along baranas kway e sin shum. Al bu he vidi ni audi nixa dashatival nu ateni "Admiral Benbo" e klosi dwar baken swa kun senta de gro-levifa. Me tuy shuani dwar, ewalaa nu zai stan al gro-spiri, ga sole in dom wo ye morten kapitan-ney korpa. Mata go pren kandela in bar, e nu ambi zin salon al teni handa de mutu. Kapitan zai lagi kom bifooen: on bey, do okos klosen e do extenden bracha-ge. - Mah kurtena nich, Jim, - mata hamsi-shwo. - Li mog ya lai e observi nu fon ausen... Nau, - ela shwo afte ke me zwo se, - treba pren klef fon toy hi wan. Bat hu ve kuraji tachi ta, me wud yao jan! - e ela ek-plaki al shwo. Me en-genui. On poda bli kapitan-ney handa ye syao papir-ney ronda, swate pa un taraf. Me bu dubi ke it hi es swate marka, e afte pren it, on otre taraf me findi skribitura do klare jamile skribitip, kel shwo: "Yu hev taim til shi de aksham". - Lu hev-te taim til klok shi, mata, - me shwo, e yus al se nuy lao kloka en-baji. Sey turan-ney baja mah nu ek-tremi, bat pa same taim to bin hao habar sikom es sol klok sit. - Den klef, Jim, pai it! - mata shwo. Me palpi-shuki in oli luy posh, un afte otre. Kelke syao moneta, un fingadan, koy filu e gran igla, tabak-rolika do loskusi-ney nok, sikin do kurve graspika, posh-kompas e agni-ston es olo ke me pai findi, e me en-denadi. - Shayad es sirkum galsa, - mata suposi. Me superi nafra e rastori kolar de ta-ney kamisa, e ver, dar, on katranen korda ke me tuy kati bay kapitan-ney sikin, ye klef. Por sey fortuna nada fulisi nuy kordia, e nu hasti uupar a toy syao shamba wo kapitan gwo somni duran tanto longtaim e wo ta-ney sunduk stan depos ti ta lai na dey. [[File:sunduk.jpg]] Fon ausen toy sunduk es ga pinchan marjen-ney sunduk, do letra “B” jal-ney bay garme fer on kapak, e do baten e rupten angulas kom si por longe e karke yusa. - Dai ba klef a me, - mata shwo. Kufla-mekanisma es rigide, bat ela pai turni it e tuy mah kapak los. Forte fauha de tabak e katran lai fon inen. Un-nem nu vidi sol un gro-hao kostum, brashen e pligen ga kuydafulem. It bu gwo gei onpon, mata shwo. Sub klaida ye diverse kosa: un kwadranta, un tin maga, kelke tabak-stik, dwa para de elegante pistola, un argenta-lingota, un lao espaniol kloka, kelke otre syaoka do bugran valor bat maistem do auslanda-ney zwosa, dwa kompas do kuprum-frama, e pet o sit kuriose Westa-Bharat-ney shel. Aften me gwo oftem divi-mediti om way ta gwo porti sey shel kun swa al suy jiva do wanda, krimen e danja. Bat nu bu pai findi nixa valorful krome argenta e kelke syaoka, e se bu es to ke nu shuki. On sunduk-diba ye un lao botakuta, blanifi-ney por solte akwa de mucho baya. Mata mah it aus nosabrem, e nu en-vidi laste kosa kel ye in sunduk: un pak kuten bay waxakapra, semblem papir-pak, e un kanvabao in kel golde moneta ek-tintini al tacha. - Me ve diki a oli sey rauber ke me es honeste gina, - mata shwo. - Me sal pren sol to ke lu debi, bu un farting pyu. Teni ba madam-Krossli-ney bao! E ela begin konti-reloki kapitan-ney mani fon kanvabao inu ti me teni na bao. To es longe e mushkile dela, por ke monetas es do diverse sais e lai fon diverse landa: ye mixi-ney i dublon, i luidor, i ginea, i piastra, i me bu jan kwo pyu. Ginea es zuy shao, e sol den ginea hi may mata janmog konti. Wen mata he konti-reloki sirke haf, me turan pon may handa on suy bracha, por ke in toy kyete froste aira en-ye suon kel hampi mah may kordia stopi: es tuk-tuking de blinda-ney stik pa frosten kamina. It blisifi oltaim pyu, e nu zai sidi al bu osi spiri. Poy ye un laute darba pa dwar de gastaguan, poy graspika en-muvi e shuan ek-baji al ke vagabonder trai zin. Poy ye silensa i ausen i inen duran kelke taim. Pa fin tuk-tuking ribegin, fa oltaim meno laute e sun fadi wek, lo kel mah nu senti nodeskribibil joisa e levifa. - Mata, - me shwo, - pren olo e nu go ba kway. - Es ke me es serte ke klosi-ney dwar sembli suspekte a blinda e ke ta mog mah-lai ol suy vespamenga-si ahir. Me joi gro por ke me he shuani dwar; sol ti koni toy dashatival blinda na jen wud mog samaji me. Bat mata, komo unkwe fobisen ela es, bu konsenti pren iven un fenka pyu kem deben, e pa same taim zidem bu yao bi santush bay meno. Ela shwo ke haishi bu es klok sem, ke nu hev menga taim, ke ela jan swa-ney raita e sal fai it. Ela zai haishi disputi kun me wen un kyete longe wisla fa-audi fon koylok dalem on kolina. To es basta e iven pyu kem basta fo nu ambi. - Me pren to ke me hev, - ela shwo al ek-salti-stan. - E me pren yoshi se fo juste konta, - me shwo al pren waxakapra-ney paketa. Pa sekwe minuta nu ambi zai go nich al palpi-shuki dao por he lyu kandela bli vakue sunduk. Sun me ofni dwar e nu chu dom. Es yus prave taim, por ke tuman zai nodensifi kway, e luna lumisi yo aika klarem den kolina pa ambi taraf. Tuman-vual haishi resti sol in diba de dol e sirkum gastaguan-ney dwar, kom si fo ahfi nuy un-ney stepas do eskapa. Bat ga sun, afte meno kem haf-dao, bli kolina-nicha, nu sal majbur geti inu luna-lumisen loko. E se bu es olo. Nu en-audi suon de lopi-she pedas de kelke jen. Al turni-kan a toy direksion, nu vidi blisifi-she salti-she luma-ki: koywan zai lai-lopi al porti fanus. - May kare, - mata shwo turan, - pren mani e lopi ba wek. Me sal dekonsi. "Es ya fin", me dumi. Me gro-damni fobishiltaa de oli nuy visin e gro-iri om may-povre-mata-ney honestitaa i avaritaa, om elay budave stupide kuraja e zai-ney feblitaa! Pa fortuna nu es bli koy ponta-ki. Me helpi ela om go nich a riva-sahil, al ke ela hili. Ela sospiri e lasi kapa lwo on may plecha. Me bu jan komo me findi forsa e fobi ke to olo bin zwo-ney aika karkem, bat me pai trani ela along riva e idyen sub arka. Pyu me bu mog, bikos ponta es tro nise e me majbur go pa char pata sub it. Also dar nu mus-nem resti, me sub arka e mata hampi totem ausen, pa dalitaa de sol kelke stepa fon gastaguan. [[Isla do tresor|Kontena]] [[Isla do tresor. Chapta 1|Chapta 1]] [[Isla do tresor. Chapta 2|Chapta 2]] [[Isla do tresor. Chapta 3|Chapta 3]] [[Isla do tresor. Chapta 5|Chapta 5]]

Return to Isla do tresor. Chapta 4.