Kan sursa

Pa pet-ney dey, snova dank a yan, sekret de syao-prinsa-ney jiva gei reveli a me. Lu kwesti turan, sin preworda, kwasi afte mediti longtaim:

— Yan, si ta chi bush, ta chi yoshi flor ku?

— Ta chi olo ke ta findi.

— Iven flor kun spika ku?

— Ya. Iven flor kun spika.

— Dan spika, li servi fo kwo?

Den se me bu mog shwo. Me zai gro-mangi trai devinti un tro klemi-ney bolta in may motor. Me es nokalme bikos situasion fa-grave, akwa do pi fa-shao, e me en-fobi lo zuy bade.

— Spika, li servi fo kwo?

Syao prinsa neva kwiti kwesta ke lu he fai. 

May bolta vexi me, e me jawabi sin dumi:

— Spika bu servi fo nixa, flor hev li simplem por dushtitaa.

— Oo!

Bat afte silensa lu shwo hampi ira-nem:

— Me bu kredi a yu! Flor es feble. E naive. Ta trai mah swa anchun. Ta dumi, ke suy spika mah oli fobi ta...

Me bu shwo nixa. In toy momenta me zai dumi: "Si sey bolta haishi resisti, me gro-darbi it bay hamra e it flai aus". Syao prinsa snova interrupti may duma:

— E yu, yu dumi ke flor...

— Non! Non hi! Me bu dumi nixa. Me he jawabi a yu sin dumi. Me mangi ya un seriose dela!

Lu kan me kun astona:

— Seriose dela?!

Lu zai kan me: hamra in handa, fingas swate por lubrikanta, me zai inklini sobre koy obyekta, kel sembli muy kurupe a lu.

— Yu shwo kom adulta!

Se idyen shamisi me. E lu adi sin pita:

— Yu konfusi olo... yu mixi olo!

Lu es verem gro-ira-ney. Lu ek-sheiki kapa, e feng desordini luy golda-ney har. 

— Me gwo koni un planeta, wo ye rude-fas-ney sinior. Lu nulves gwo snifi flor. Lu nulves gwo kan stara. Lu nulves gwo lubi eniwan. Lu nulves gwo zwo enisa krome sumi sifras. 

E duran ol dey lu repeti, ga kom yu: "Me es seriose jen! Me es seriose jen!" e to mah lu inflifi por garwitaa. Bat ta bu es jen, es funga!

— Es kwo?

— Funga!

Syao prinsa es iven pale por ira. 

— Duran milion yar flor mah-kresi spika. Duran milion yar yan yedoh chi flor. Ob se bu es seriose dela, tu samaji, way ta gro-trai mah-kresi spika, si li es bu utile? Ob gwer inter yan e flor bu es muhim? Ob se bu es pyu seriose e pyu muhim kem sifra-suming de rude-fas-ney sinior? E si me koni unike flor in munda, kel existi nullok exepte may planeta, e pa un sabah syao yan chi ta sin samaji kwo ta zwo, — ob se bu es muhim?

Lu fa-rude. Poy lu shwo for:

— Si yu lubi flor, unike single flor miden milion stara, se sufi fo bi felise wen yu kan staras. Yu shwo a swa: "May flor es koylok dar..." Bat si yan chi ta, es fo yu kwasi oli stara turan tushi! E se bu es muhim!

Lu bu mog shwo pyu. Lu turan en-plaki gro. Fa-nocha. Me kwiti gun. May hamra, may bolta, pyasa e morta fa-mokival fo me. Pa un stara, pa un planeta, may-la, Arda, ye syao prinsa ke oni treba konsoli! Me pren lu inu brakas, me luli lu. Me shwo: 

"Yu lubi na flor bu es in danja... Me ve rasmi musladan fo yur yan... Me ve rasmi panza-ki fo yur flor... Me..." Me bu jan hao kwo shwo. Me senti swa gro-nokushale. Me bu jan, komo ateni lu, komo rikontakti lu... Landa de larmas, it es ya misteriaful.