Kan sursa

Tak me en-jan yoshi un muhim kosa: suy planeta es apena pyu gran kem un dom!

Yedoh, se bu astoni me gro. Me jan, ke krome gran planetas kom Arda, Jupiter, Marsa e Venus, a kel oni he dai nam, ye yoshi stokas de otre-las, kel es koyves tanto syao, ke es gro-mushkile vidi li bay teleskop. Wen astronomier deskovri un de li, ta dai a it numer inplas nam. Fo exampla, ta nami it "asteroida 3251".

Me hev seriose reson fo opini, ke planeta de syao prinsa es asteroida B-612. Sey asteroida bin vidi-ney bay teleskop sol un ves, in yar 1909, bay un turke astronomier.

Ta he zwo dan gran prisenta om suy deskovra pa Internasion-ney Astronomike Kongres. Bat nulwan he kredi a ta por suy klaida. Tal hi es adultas.

Pa fortuna fo reputasion de asteroida B-612, turke diktator mah-te suy jenmin, sub mortapuna, klaidi swa kom europajenta. Toy astronomier, klaidi-ney gro-elegantem, rizwo-te suy prisenta in 1920. E al sey ves oli opini samem.

Tanto detal-nem me zai rakonti a yu om asteroida B-612 sol por adultas. Adultas gro-pri sifra. Wen yu shwo a li om yur nove amiga, li neva kwesti om lo shefe. Li neva shwo: "Komo luy vos suoni? Kwel geimes lu preferi? Ob lu kolekti parpar?" Li kwesti: "Kwel es luy yash? Kwanto brata lu hev? Kwanto lu vegi? Kwanto luy patra gwin?" Sol dan li opini, ke li koni lu. 

Si oni shwo a adultas: "Me he vidi un jamile dom do rose brik, kun geranium pa winda e paloma pa ruf", — li bu pai imajini sey dom. Treba shwo a li: "Me he vidi dom do sto mil franko", — e dan li ek-krai: "Oo es ya gro-jamile!"

Samem, si yu shwo a li: "Syao prinsa existi, e walaa pruva: lu bin admirival, lu he ridi, lu he yao yan. E si oni yao yan, es pruvi-ney, ke oni existi", — li sol ek-lifti plechas e trati yu kom kinda. 

Bat si yu shwo a li: "Ta lai na planeta es asteroida B-612", — dan li es konvinsi-ney e bu tedi yu bay ley kwesta. Tal hi li es. Bu gai fa-vexi por li. Kindas mus bi muy indulgishil versu adulte jenta.

Bat nu, toy-las hu samaji jiva, nu sertem moki sifra! Me wud yao begin sey historia kom fabula. Me wud yao begin tak:

"Unves ye syao prinsa. Lu jivi pa planeta, kel es apena pyu gran kem lu, e lu gro-nidi amiga..." A toy-las, hu samaji jiva, to wud suoni mucho pyu verem.

Me bu yao ya, ke oni lekti may kitaba fo amusi swa. Me sta triste al rakonti sey rememba. Sit yar yo he pasi afte ke may amiga he kwiti me kun suy yan. E me zai trai deskribi lu, dabe bu fogeti. Es triste tu fogeti amiga. Bu kada jen hev amiga. E me mog bikam tal kom adultas kel bu fai interes om enisa krome sifras. 

Yoshi por se hi me he kupi boxa kun pintas e kelke kolorkalam. Bu es fasile tu begin rasmi in may yash, si oni bu gwo rasmi enisa krome lo inen e lo ausen de boa, e sol al yash de sit yar! Sertem, me ve trai mah portreta zuy realitaa-simile. Bat me bu es ga sigure, ke me susksesi. Un rasma es hao, otre-la bu es simile. 

Yoshi me idyen fa-trompi relatem gaotaa. Hir syao prinsa es tro gran, dar lu es tro syao. Me hesiti yoshi relatem kolor de luy klaida. Also me trai rasmi tak e trai otrem, nau pyu hao, nau pyu bade. Pa fin, me mog galti om koy muhim detal. Yedoh gai ke oni pardoni se a me. May amiga he nulves expliki enisa a me. Mogbi lu he dumi, ke me es same kom lu.

Bat, pa afsos, me bu janmog vidi yan tra boxa. Mogbi me es idyen kom adultas. Shayad me fa-lao.