Kan sursa

= Chapta 2. Swate Doga apari e desapari = Sun afte to ye un-ney de toy misteriaful eventas dank a kel nu fa-libre fon kapitan pa fin, obwol, kom yu ve vidi, bu fon ti gwansi ta na delas. Es muy lenge hima do longe gro-frosta e forte feng. Fa-klare ke may povre patra apena ve mog vidi vesna. Kada dey ta sta pyu buhao, e may mata e me majbur zwo olo om gastaguan. Nu ambi mangi e fai shao atenta an nuy noprival gasta. Es rane januar-ney sabah do piki-she frosta. Baya es grey por frima. Onda-ki zai lisi ston mulem. Surya es haishi nise e sol en-tachi kolina-uupara e mar-ney dalitaa. Kapitan en-jagi pyu ranem kem pinchanem e go a mar-sahil, al abordaja-ney zian pendi-swingi-she sub chaure lapa de lao blu palto, al birinje vidituba sub bracha, e al shapa shifti-ney bak. Me remembi ke suy spira es vidibile kom fuma al ke ta go. Me audi komo ta farfari indignem al turni gran roka, kom si ta haishi dumi-iri om doktor Livsi. Wel, mata es uuparen she patra, e me zai bepon tabla fo sabahfan bifoo kapitan-ney laisa, al ke dwar ofni e ti me bu gwo vidi bifooen na man zin salon. Suy fas es do waxalik palitaa. Ta falti dwa finga pa lefte handa. Malgree zian pa kamar, ta bu aspekti kom batalnik. Me sempre gro-atenti eni marjen, ob do un o do dwa gamba, e me remembi ke toy wan mah me perplexe. Ta bu simili marjen, yedoh ye hi koysa do mar pa ta. Me kwesti om komo servi ta, e ta demandi rom; bat wen me en-go aus shamba fo bringi it, ta en-sidi on un tabla e jesti-voki me. Me stopi wo me es, kun serveta in handa. "Lai ba, son-ki," ta shwo. "Lai ba pyu blisem." Me lai pyu blisem. "Ob sey tabla es bepon-ney fo may amiga Bili?" ta kwesti al dussmaili. Me shwo ke me bu koni nul Bili e ke sey tabla es fo un gasta kel habiti in nuy gastaguan e ke nu nami kapitan. "Wel," ta shwo, "Bili to gayar shayad nami swa kapitan, es ta-simile. Ta hev skara pa wanga, e ta fai prival suluka, osobem al sta pyan, tal hi es Bili to gayar. Nu prepon ba, kom gesa, ke yur kapitan hev un skara pa wanga, e ke toy wanga es desne-la. Aa, ya! Me shwo ya. Wel, nau me yao jan ob ta es in sey dom nau, may amiga Bili?" Me shwo ke ta he go wek fo promeni. "A kwel taraf, son-ki? A kwel taraf ta he go?" Me indiki roka e expliki pa kwel dao kapitan sal zuy probablem lai e komo sun. Ta fai yoshi kelke kwesta, poy shwo: "Ya, Bili to gayar ve joi por vidi me samem kom por vidi rom." Yedoh suy fas es ga dushte al ke ta shwo se, also me opini ya ke toy gariba galti, iven si ta maini to ke ta shwo. Bat me tuy dumi ke to bu gwansi me; krome to, es mushkile tu samaji kwo zwo. Gariba zai stan ga bli zin-dwar de gastaguan e wahti dom-angula kom kota kel wahti-weiti maus. Me en-go aus a kamina, bat ta tuy voki me bak, e sikom me bu obedi tuy, suy pale fas turan fa-gro-terible, e ta komandi ke me returni, shatami-yen tanto gro ke me ek-salti. Bat tuy afte ke me lai bak, ta snova en-fai suy bifoo-ney manera: al haf-lesti e haf-moki ta klapi-klapi me an plecha, shwo ke me es hao boy, e ke ta pri me aika gro. - Me toshi hev un son, - ta shwo, - ta gro-simili yu, e may kordia do patra garwi gro por ta. Bat lo muhim fo boy es obeda. Ya, son-ki, obeda hi. Si yu wud he navigi kun Bili tuhun, oni bu wud majbur voki yu pa dwa-ney ves, non hi. Bili neva repeti komanda, i otre-las toshi... Aa, walaa hi Bili to gayar, kun vidituba sub bracha, sertem es ta, boh blesi ba ta! Nu go ba, yu e me, bak inu salon e ahfi swa baken dwar, son-ki. Nu fai ba syao surpisa fo Bili, boh blesi ba ta, me repeti." Al shwo to, gariba bakmuvi kun me inu salon e mah me stan pa angula baken ta, also nu ambi es ahfen bay ofni-ney dwar. Me sta aika nobyen e alarmi-ney, kom yu mog ya imajini, tem pyu ke, kom me merki, gariba selfa evidentem fobi. Ta tachi-tayari graspika de zian e laxi it-ney blada in ziandan, e oltaim duran ke nu weiti, ta fai gloting, kwasi ta senti koy bloki-she tuan in gorla. Pa fin kapitan shum-nem zin salon e klapi-klosi dwar. Sin kan a desna o lefta, ta go rek a swa-ney tabla kun sabahfan. - Bil! - gariba shwo al trai mah swa-ney vos kuraje e resolute. Kapitan turni on kabluk e miti-vidi nu; ewalaa ol bruntaa de suy fas fa-wek tuy, e iven nos fa-blu. Ta aspekti kom wan kel zai vidi koy fantom, o diabla selfa, o koysa pyu bade, si to es posible. Ga honestem, me en-piti ta al vidi ke ta turan fa tanto lao e feble. - Kamon, Bil, yu rekoni me; yu rekoni swa-ney ship-amiga, sertem, Bil to gayar, - gariba shwo. Kapitan fai tufi-ney ek-spira. - Swate Doga! - ta shwo. - Ver ya, - otre-la repliki al fa pyu kuraje. - Swate Doga, kom sempre, lai fo visiti swa-ney ship-amiga Bili kel habiti in "Admiral Benbo" to gastaguan. Ah, Bil! Tanto mucho taim he pasi depos ke me lusi dwa may naka," - ta exklami al lifti-diki mutili-ney handa. - Wel, nau, - kapitan shwo, - yu he findi me; walaa me. Wel, dan, shwo, kwo ye? - Ver, walaa yu, Bil, - Swate Doga jawabi. - Yu es prave, Bili. Me ve pi glasa-ge rom ke sey prival kinda sal bringi fo me, e nu en-sidi ba e toki ga frankem, kom lao ship-amigas. Wen me returni kun rom, li zai sidi yo pa ambi taraf de kapitan-ney tabla do sabahfan. Swate Doga sidi pyu blisem a dwar e ta es kelkem turnen versu it, dabe mog kan pa same taim an suy lao ship-amiga e an dwar to chudao, segun me. Ta komandi ke me go wek al lyu dwar ga ofni-ney. - M’bu yao nul ahfi-kaning tra kufladun, son-ki, - ta shwo, e me go wek a kukishamba al kwiti li pa hunta. Duran longtaim me audi nixa krome nodistinte murmuring, obwol me gro-trai slu. Bat pa fin voses fa-laute e me pai samaji kelke worda, maistem shatama, fon kapitan. - Non, non, non, non, e basta om se! - ta krai. E poy snova, - Si dela fini bay pending, hay oli pendi, oli hi! Poy, ga turan, ye gro-shatama-explosa, stula e tabla lwo-guruhi, stal tintini, koywan ek-krai por tunga, e afte momenta me vidi ke Swate Doga zai fugi a dwar e kapitan persekwi ta, ambi al zian tayar fo batala. Hema zai flui fon Swate-Doga-ney plecha. Yus bli dwar kapitan goli an fugi-sha fo fai laste gro-darba, kel sertem wud rasrupti ta-ney kapa, si zian bu wud trefi gran jaopay de "Admiral Benbo". Haishi nau oni mog vidi trasa pa nicha de frama. To es fin de batala. Afte pai chu a kamina, malgree swa-ney wunda, Swate Doga en-lopi tanto kway ke ta fa-wek baken kolina afte haf-minuta. Kapitan zai stan al kan jaopay turdi-nem. Poy ta pasi handa pa okos pluri ves, e pa fin returni inu dom. - Jim, - ta shwo, - rom! - e ta ek-hili e apogi kontra mur bay handa dabe bu lwo. - Ob yu es wundi-ney? - me krai. - Rom! - ta repeti. - Me mus go wek fon hir. Rom! Rom!" Me lopi fo bringi it, bat por sta ga nokalme, me lasi-lwo rupti un glasa e bu mog duyfu kran longem, e al ke me haishi trai ladi se olo, me audi koy laute lwosa in salon. Me lopi-zin it e findi kapitan lagi-she on poda pa fule swa-ney gaotaa. Pa same taim may mata, alarmi-ney bay kraisa e batala-suon, lopi-lai fo helpi me. Nu lifti-ki ta-ney kapa. Ta zai spiri muy lautem e mushkilem, bat suy okos es klosen e suy fas es do dashat-ney kolor. - May Boh! - mata exklami, - Es ya shmah fo nuy dom! E yur povre patra yus morbi! Nu ga bu jan kwo zwo fo helpi kapitan, dumi-yen ke ta pai-te morta-ney darba duran batala kun gariba. Me bringi idyen rom e probi liti it inu ta-ney gorla, bat suy dentas es klemen e suy jabra es forte kom fer. Pa fortuna dwar ofni e doktor Livsi lai fo visiti may patra, lo kel mah nu senti gran levifa. - Oo, doktor, - nu krai, - kwo zwo? Wo ta es wunden? - Wunden ku? Absurdika! - doktor shwo. - Bu pyu wunden kem me o yu. Es sim apoplexike darba. Me ya he warni ta. Wel, madam Hokins, go ba uupar a mursha e, si es posible, shwo a ta nixa om se. E me selfa sal trai salvi novalor-ney jiva de sey gayar... Jim, bringi ba pen. Wen me lai bak kun pen, doktor he yo uuparroli kapitan-ney mansha e mah-nude suy gro-gran tendonmuy bracha. On it ye kelke tatu. Oni mog lekti "Pro fortuna", "Pro byen feng", e "Hao kisma de Bili Bons", ga distintem fai-ney on uuparbracha. Bli plecha ye rasma de galga kun pendi-sha, zwo-ney aika kushalem, segun me. - Es profetike, - doktor shwo al tachi rasma bay finga. - E nau, sinior Bili Bons, si to es verem yur nam, nu sal kan kolor de yur hema... Jim, - ta shwo-adresi me, - yu fobi ku hema? - Non, sinior, - me shwo. - Hao. Dan, - ta shwo, - teni ba pen. - Afte shwo se ta pren lanset e kati-ofni vena. Menga hema fa-aus bifoo ke kapitan ofni okos e kan nu vagem. Un-nem ta rekoni doktor e fruni, poy ta merki me e kwasi levifi. Poy suy fas turan fa-rude, e ta krai al trai en-stan: - Wo es Swate Doga? - Hir nul doga yok, - doktor shwo, - krome toy-la kel glodi yu fon inen. Yu pi-te tro mucho rom; yu pai-te darba, yus kom me he preshwo. E me yus he tiri yu aus kabra, obwol ga sin yao. Wel, sinior Bons... - Me bu nami Bons, - ta interrupti. - Bu muhimi, - doktor shwo. - Es nam de un pirata ke me koni, e me nami yu tak fo kurtitaa. Me gai shwo a yu lo sekwe: un ge glasa rom bu ve kili yu, bat yu pi un ge, yu ve pi yoshi un ge e yoshu un ge, e dan, kasam do may peruka, si yu bu kwiti pi, yu ve morti, samaji ku? Ve morti e go a swa-ney plasa, kom Biblia shwo... Also, kamon, eforti-trai ba. Me sal helpi yu ateni kama, pa sey ves. To bin aika mushkile, bat nu pai tiri-bringi ta uupar sulam e mah-lagi ta on kama, al ke suy kapa lwo on kushen kom si ta hampi dekonsi. - Also, remembi ba, - doktor shwo, - me shwo a yu e purisi may kojansa: rom nami morta fo yu. Afte se ta go visiti may patra e pren me kunem, teni-yen may handa. - Es syaodela, - ta shwo tuy afte ke nu klosi dwar. - Me he ausfai basta hema, e ta ve sta kalme fo aika longtaim. Hay ta lagi in kama fo un wik, es ya zuy hao i fo ta i fo yu oli. Bat yoshi un darba ve sertem mortisi ta.

Return to Isla do tresor. Chapta 2.