Kan sursa

"Ana miti..." es kontinusa de lernikursa [[Ana Pana]] [http://lidepla.esy.es/node/203 "Ana miti..." pa Lideplandia kun tamrin] == ...suy amiga == Ana: Salam! Amiga: Ana, salam! Ana: Me joi por vidi yu! Komo yu sta? Amiga: Ga hao, danke! E yu? Ana: Toshi hao. Me bu vidi-te yu duran longtaim. Kwo yu zun al nau? Amiga: Me studi. Yo hampi un yar, pa universitet. Ana: Kwo yu studi, me fai interes? Amiga: Kompa-fah. Also programing, internet etf (e tak for). Me pri gro. Ana: Gro-hao! Amiga: Kwo om yu? Ye habar? Ana: Me he desidi fai nove longe safara. Treba sol pai kelke mani... Amiga: Yu es ya gro-safarnik! Bukredibile... Mogbi nu go a koy kafee e yu rakonti om yur safara-planes? Ana: Hao idea! Yoshi me yao audi pyu om studenta-ney jiva. Amiga: Me koni un hao kafee, es ga bli. Ana: Dan nu go ba! == ...suy mata pa sabah == Ana: Hao sabah, mami! Mata: Sabah hao! Yo jagi ya?! Ana: Ya, me yao plei tenis bifoo go a skola. Mata: Klare. He somni hao ku? Ana: Bu tro... Me sonji om examen de franse. Toy examen bin ya gro-mushkile! Mata: Ver ku? Shayad yu gai lerni franse pyu. Ana: Me jan ya. Bat me hev ga nul yaosa... Mata: Me bu mog samaji to... Tu lerni nove lingwas es ya interes-ney! Ana: Fo yu, bat bu fo me. Me preferi ya fai sporta. Mata: Me jan yur opina. Enikas, me ve helpi yu kun plesir om franse si yu yao. Ana: Danke, mami! Ve kan. Treba hasti ya nau. Me hev un muhim geim sun. Adyoo! Mata: Adyoo, kare! Hao dey! == ...suy tenis-partner == Ana: Walaa yu pa fin! Way tanto tarde? Tenis-partner: Salam, Ana, skusi... Ana: Olo in ordina ku? Tenis-partner: Ya... Bat me bu pai-te bus. Ana: Yu tardi ya pa dwashi-tri minuta, me he hampi go wek! Tenis-partner: Me joi por ke yu resti! Me ya pri fai tenis! Ana: Me toshi. Pardoni ba may buhao muda. Me he somni bu basta pa sey nocha. Shayad por to hi me he lusi sabra. Tenis-partner: Me samaji. Es syaodela. Me nadi ke yu hev basta mogsa fo un tenis-geim... Ana: Oo, ya! Me es tayar fo gro-batala. Aida a tenis maidan! Tenis-partner: Ver ya! Bat bu fa-triste por may fasile jita! Sedey me senti swa tayar fo gro-hao pleisa! Ana: Ha, me bu fobi yur bata! == ...suy klas-amigas == Ana: Hey, amigas, kwo ye?! Klas-amiga 1: Bu mucho habar... Me zai haf-somni... Bat yu hi aspekti muy energike. Ana: Oo, ya. Me he plei tenis e he jiti un mushkile geim. Also me he pai energia. Klas-amiga 2: Me nadi ke yu hev basta energia yoshi fo testa pa franse sedey. Ana: Kwo yu shwo?! Es joka ku? Klas-amiga 2: Non, pa nofortuna. Segun sms-mesaja fon amiga in nuy paralele klas, li zai hev testa pa franse. Es un fon toy dashat-ney "surprisa-testa" de sinior-Kadar. Ana: To maini ke nu sal hev it duran nuy franse-leson. Semblem yu es prave... Shatam! Klas-amiga 1: Es terible, bu ver? Me toshi bu he lerni mucho de franse pa laste taim. Ana: Me senti ke me fa-morbi ya turan. Klas-amiga 1: Yu bu sembli morbi. Yu aspekti sol muy energike, yoshi idyen ira-ney e... Klas-amiga 2: E kwel? Kan ba, nuy kare fatigi-ney wan fa-rude! Klas-amiga 3: Semblem lu yus yao-te shwo "e muy jamile" o koysa simile. Ana: Stopi ba, yu huligan! Nu mus ya konsentri on nuy testa. Klas-amiga 2: Komo oni shwo "muy jamile" pa franse? Klas-amiga 3: Me jan sol komo shwo "Me lubi yu, Ana", si koywan fai interes... Ana: Stupidas ya! Klas-amiga 2: Ga non, nu sol trai helpi yu dwa om franse... == ...suy brata e sista afte middey == Brata: Ana, hao dey! Komo yu sta? Ana: Idyen fatige. Nu hev-te gran testa sedey in skola. E yu? Sista: Ga hao, nu joi por go a swimilok! Brata: Nu darfi bi dar duran tote aksham, es gro-hao, bu ver? Ana: Ya, sertem gro-hao fo yu ambi, yu fish-ki. Sista: Kwo yu plani fo aksham? Ana: Shayad me go kan kino kun amiga. Brata: Kwel kino yu ve kan? Ana: Nul idea. Nu mus un-nem desidi ob nu go. Brata: Strane logika. Pinchanem me un-nem en-jan ob es hao kino e sol poy me desidi ob me go a kinoguan. Sista: E ”nu”, kwo to maini? Ana: Me e un amiga. Sista: Kwel amiga? Ana: Nove amiga. Sista: Hu es sey nove amiga? Ana: Es koy me-ney amiga. Me ve go kan koy kino kun koy amiga. Shayad ve go. Klare ku? Brata: Non, bu klare... Sista: Ga klare: Ana plani go kun elay nove lubiboy. Brata: Ver ku? Es habar! Me bu he jan ke yu hev nove lubiboy. Ana: Lu yok ya. Yur sista imajini ya tro koytaim, ob yu bu he merki? Brata: Wel, doh. Sista: Bye audi, ela yao sol ahfi suy mita kun nove lubiboy pa sey aksham! Ana: Kare, mu bu hev taim pyu. Me mus telefoni... Brata: A hu? Ana: A koywan. Brata e sista tuhun: Shwo swasti a lu fon nu!! == ...suy koywan == Ana: Yu pri kino ku? Koywan: Wel, to bin pyu hao kem nuy franse-leson sedey... Ana: Ver, bat bu mucho. Koywan: Exakte. Sertem to bu es un fon zuy hao kino ke nu gwo kan. Ana: Bat amini aktores es jamile, bu ver? Koywan: Me toshi he dumi om to. Aktorina do shef-ruola sembli hampi anjel a me. E toy manjen do swate kurlihar sertem bu es kurupe. Ana: Lu idyen simili yu, me dumi... Koywan: Ver ku? Ana: Ya, yu ridi sam privalem kom toy aktor. Iven pyu privalem, pa fakta. Koywan: Me danki. Me sertem snova fa-rude... Ana: Es nixa. Yu es sempre prival, iven wen yu fa-rude. Koywan: Yu fai ya tro. Ana: Kwo yu yao-te bat bu kuraji-te shwo sedey pa sabah? Koywan: Wen nu en-jan om testa pa franse? Ana: Exakte. Koywan: Wel, me bin fatige e bu mog-te hao kontroli may muh. Me yao-te shwo to bifooen, bat sertem bu wen ye otre jen... Ana: Me samaji, me toshi shwo idyen stranem wen me es fatige. Koywan: Enikas, me yao-te shwo ke me gro- (***Telefon baji***) Aa, es may mobila. Skusi ba. Koywan (telefoni): Ya? Salam, may kare! Me toshi sinian om yu! Ya, me yao-shem lai a yu pa nocha, ve bi tanto hao... E wen ye sekwi-she tren? Hao, es posible si me lopi tuy! Til sun, may kare! Ana: Yu treba go ku? Koywan: Pa afsos ya, tuy – treba pai tren. Danke por yur invita a kinoguan sedey. To bin ga priate aksham. Til mita in skola! Adyoo! Ana: Adyoo... == ...suy patra pa aksham == Patra: Ana, may kare, me joi al snova vidi yu. Ana: Me toshi. Kwo yu zai zwo? Patra: Me zai weiti yu, faktem. Me yao proposi ke yu chi kelke sup. Es kuki-ney segun nove resepta, me nadi ya ke yu pri it. Ana: Me bu fai hunga... Patra: Wel, yu sertem mog chi idyen sup. Sol fo gusti. Me pregi yu, lai ba a kukilok. Ana: Me jan ya ke sup es muy hao, oli yur sup gusti hao. Patra: Ana, me bu rekoni yu! Yu neva refusi gusti nove sup... In sey-la ye karota e florkol e idyen luk. Me iven he pon yur favorite masala. Walaa un pyata. Ana: Danke. Patra: Manya me plani kuki gran mar-fan-sup e poy pren it a gunsa fo may gun-tim. Li sempre gro-joi we me bringi koysa chibile. Also, kwo yu dumi om may nove sup? Ana: Es hao. Bat me bu fai hunga, faktem me bu sta hao... Me dumi ke me go fai kama tuy. Patra: Kom yu yao, may docha. Me nadi ke manya yu sta pyu hao e ve mog hao-hao chi may mar-fan-sup. Ana: Sertem. Hao nocha. Patra: Hay yu sonji om koysa do hao gusta! == ...suy Jungwo-amigina pa internet == Ana: Yu es hir ku? Amigina: Ya, me yus en-jagi-te e yao lekti e-meil. Ana: Ye taim fo shwo-shwo ku? Amigina: Sertem. Me sempre hev taim fo may zuy hao internet-amiga :) Ana: Gro-hao, danke. Me he anubavi koysa muy strane sedey pa aksham e nau me nidi konsila om to. Amigina: Me trai ya. Shwo ba kwo ye. Ana: Also, yu jan ya ke me fai interes om un boy fon may klas duran kelke taim yo e sedey me he kuraji inviti lu a aiskrem-kafee e poy a kinoguan. Amigina: Muy hao. Me ya shwo-te ke treba miti lu sole fo samaji, kwo lu senti versu yu. Ana: Ya, e to bin ya muy priate wen nu zai shwo-shwo chi-yen aiskrem e poy zai sidi bli mutu kan-yen kino. Amigina: Me joi ya! Bat kwo disturbi yu? Ob yu dumi ke lu bu pri-te to? Ana: Semblem lu toshi pri bi kun me tuhun. Lu smaili mucho e bin muy prival e latif versu me. Koyves lu iven fa-rude, tanto mule ya! Amigina: Hao ya, bat kwo es problema? Semblem yu dwa hampi fa-para. Ana: Me toshi he kredi to... Bat afte kino koywan telefoni a lu, e lu nami toy koywan “may kare”. Afte telefoni lu faktem kwiti me ga turan fo go a ela fo zwo ti me bu jan na kwo... Amigina: Hmm, bat mogbi to bin luy sista o sista-inloo o simplem hao amigina. Amini me koyves nami may brata-sista o koy otre rishta “may kare”. Ana: Mogbi... Yedoh sembli a me ke temi om luy lubigela... Amigina: Kare, bu sta tro triste. Oni neva jan om fortuna. Me sal rakonti a yu un syao han fabula, konsenti ku? Ana: Hao, me yao-shem “audi” it. Amigina: Un agrajen hev muy jamile e hao kaval kel helpi lu mucho pa gunsa. Unves ta lopi wek. Wen visin en-jan om to, li oli afsosi e piti lu. Bat toy agrajen shwo: “Wel, nu neva jan om fortuna. Me sempre fidi it.” Afte kelke dey toy kaval lai bak, kun mucho savaje kaval tuhun. E oli visin gratuli ya toy agrajen. Lu sta felise bat kalme e bu troisi toy eventa. Lu shwo “oni neva jan kwo sal eventi pa jiva bat gai jui it tanto kwanto posible”. Son de agrajen lwo raki-yen un de toy savaje kavales e rupti gamba. Oli visin snova gro-afsosi om toy beda bikos son de agrajen bu mog helpi patra pa gunsa. Bat agrajen kontinu bi kalme e shwo ke treba fidi ya jiva. Sun un gwer begin e oli yunge manjen mus-nem go batali. Sol son de agrajen bu go batali por rupti-ney gamba, e oli visin gratuli agrajen por tal fortuna, bikos lu amini bu riski morti. E tak for, eventa afte eventa. Ana: Interes-ney. Amigina: Konkluda es, segun me, ke koyves bu es fasile tu samaji way koysa eventi bat poy fa-reveli ke to olo es sol nesese parta-ki de nuy jiva pa arda. Also, jui ba yur jiva tanto kwanto posible e bye nokalmi tro wen koy mushkila eventi! Ana: Pyu fasile shwo kem zwo... Yedoh me trai ya dumi kom toy agrajen. Es hao tu chati kun yu! Nau me treba somni. Amigina: Hao nocha e forsa a yu! Ana: Danke. Olo zuy hao a yu! Adyoo! Amigina: Me kisi yu. Adyoo!

Return to Ana miti....