Kan sursa

{{Edita}} Me sal rakonti a yu om Alisa to lwonik. Way lwonik? Bikos ela lwo oltaim a olilok. Unves opa shuki ela fo kungo a garden: - Alisa! Wo es yu? Alisa! - Me es hir, opa! - Bat wo es sey hir? - Hir, in kloka to jagiser. Imajini ba, in kloka to jagiser! Ela he en-yao jan kwo fai tik-tak oltaim. Ela en-yao tanto gro ke ela ofni windakin pa bakkapak e tuy geti inen, miden oli sey syao dentarada e pruja. Also ela majbur salti oltaim fon un dentakin a otre-la fo bu tabahi inen oli sey jatile mekanisma kel zai virti oltaim e fai “tik-tak”. Pa otre ves opa shuki ela fo chi sabahfan: - Alisa! Wo es yu? Alisa! - Me es hir, opa. - Wo es sey hir? - Ah, hir, ga blisem! In botela! - Bat komo yu he geti inu it? - Me en-pyasi gro e poy laik plesk, ewalaa me es inen. Ver ya, ela lwo rek inu botela kun akwa! Ela majbur gro-muvi gambas a brachas fo bu droni. Pa fortuna pa saif, al bi in Sperlonga, ela lerni-te swimi. - Wel, toleri ba idyen, me sal mah yu aus! Opa pon longe korda inu botela, e Alisa klimbi uupar kushalem. Al se ela en-samaji komo muhim es tu zun gimnastika. E unves Alisa desapari. Opa shuki ela, e oma shuki ela, e iven ti lai kada dey fo lekti opa-ney gaseta na visin shuki ela toshi. - Ah, es ya gro-beda! – oma hamsi al sta gro-fobisen. – Kwo nu ve zwo si nu bu findi ela til ke elay patra e mata lai a dom afte gunsa? - Alisa! Wo es yu? Alisa! Bat pa sey ves Alisa bu jawabi. Ela bu mog jawabi. Al wandi pa kukishamba ela he ek-kan yoshi inu tiriboxa wo ye tablakovras e servetas. Ela ek-kan e tuy lwo inu it. Servetas es aika mole, ewalaa Alisa en-somni on li. Koywan go pas e mah tiriboxa inu. Hu mog-te gesi ke Alia es inen? Al en-jagi ela vidi ke olo es ga tume sirkum. Yedoh ela ga bu en-fobi. Ela gwo lwo inu woshi-stanka, e dar bin iven pyu tume. “Sun oni ve bepon tabla fo sabahfan, - Alisa dumi. – Li ve sertem nidi tablakovra, ofni tiriboxa e tuy findi me.” Bat hu mog dumi om sabahfan, si Alisa fa-wek? Pa sabah elay patra e mata lai, en-shatami opa e oma: Wel, yu ga bu kuydi om kinda! - Bat nuy kindas bu gwo lwo inu woshi-stanka, - li objeti. – Pa nuy taim li gwo lwo maximum fon kama, e por se li pai nul nuksan krome un balja pa frenta. Duran to Alisa fa-tedi por weiti. Ela mah tablakovras e servetas a taraf, ateni tiriboxa-diba e begin tompi gro. “Tuk! Tuk! Tuk!” - Shsh! – patra show. – Sembli a me ke oni tuki koylok. Ewalaa Alisa fai pyu lautem: “Tuk! Tuk! Tuk!” Oni ya kisi e embrasi ela agro afte findi in tiriboxa. E kwo om Alisa? Ela tuy utilisi situasion fo lwo inu posh de papa-ney jaketa. E duran ke oni tiri ela aus, ela pai fa-gande bay tinta por ke ela yao-te plei kun papa-ney bolkalam. [[Category:Fabula]]

Return to Alisa to lwonik.