Kan sursa

= SWINA E PEPA = '''Pretayar version''' Duran para minuta ela stan al kan dom e al trai samaji kwo gai zwo, e turan un lakey in livree lopi-lai aus shulin (ela dumi ke ta es lakey por ke ta porti livree; otrekas, al kaulu sol suy fas, ela wud nami ta fish) e en-tuki lautem pa dwar bay fingajor. Otre lakey in livree, do ronde fas e do gran okos kom bakak, ofni dwar. Alisa merki ke ambi lakey hev pudri-ney har kel kurli pa tote kapa. Ela en-hev gro-jigyas fo en-jan kwo ye, e ahfi-go idyen aus shulin fo audi. [[File:De Alice's Abenteuer im Wunderland Carroll pic 20.jpg|De Alice's Abenteuer im Wunderland Carroll pic 20|350px]] Fish to lakey un-nem mah-ye fon sub bracha un gro-leta, hampi sam gran kom ta selfa, e handi it a otre-la al shwo solemnem: - "Fo dukina. Invita fon Regina om plei kroket." - Bakak to lakey repeti sam solemnem al sol idyen shanji worda-ordina: - "Fon Regina. Invita fo Dukina om plei kroket". Poy li ambi pokloni nisem, e ley harhalkas hampi intertangli. Alisa ridi por to tanto gro ke ela majbur lopi inu shulin, dabe li bu audi ela. Wen ela snova ahfi-kan, ela vidi ke Fish to Lakey he fa-wek e ke otre-la zai sidi on arda bli dwar al kan skay stupidem. Alisa timidem lai a dwar e tuki. - Tu tuki ga bu es utile, – lakey shwo, – por dwa kausa. Un-nem, por ke me es pa same dwar-taraf kom yu; dwa-nem, por ke li inen zai shumi tanto gro ke nulwan mog audi yu. - Ver, sertem ga nopinchan suon <i>lai</i> fon inen: konstante wuling e chihing e yoshi regulare krushi-suon, kom si pyata o ketla rupti inu pes. - Dan, plis, shwo ba, - Alisa shwo, - komo me gai geti inu? - Yur tuking wud mog bi utile - Lakey shwo for sin atenti ela, - si nu wud hev dwar inter nu. Pa exampla, si yu wud bi <i>inen</i>, yu wud mog tuki, e me wud lasi yu aus, es ver. - Ta zai kan skay oltaim al shwo, e Alisa ek-dumi ke to es ga nolatif. - "Yedoh shayad ta sim bi mog fai otrem" - ela shwo a swa, - "sikom suy okos es ya tanto <i>muy</i> blise a kapasima. Bat enikas ta gai jawabi kwesta." – Komo me gai geti inu? - ela repeti lautem. - Me sal sidi hir - Lakey remarki, - til manya... Yus al se dwar ofni e un gran pyata flai aus, yus an Lakey-ney kapa; it tachi-ki suy nos e krushifi kontra un baum baken ta. - ...o mogbi til aftemanya... - Lakey zai kontinu pa yus same ton kom si nixa he eventi. - Komo me gai geti inu? - Alisa kwesti snova, pyu lautem. - Ob yu verem <i>gai</i> geti inu? - Lakey shwo. - Es ya prime kwesta. To sertem es ver, yedoh Alisa bu pri gei shwo tak. - "Es ya dashat-ney" - ela grumbli a swa, - "komo gro oli sey kreatura pri disputi. Es ya basta fo fa-pagale!" Lakey semblem desidi ke es hao taim fo repeti suy remerka kun syao varia. - Me sal sidi hir - ta shwo, - duran gro-taim, duran mucho hi dey. - Bat kwo <i>me</i> hi gai zwo? - Alisa shwo. - Enisa ke yu yao, - Lakey shwo e begin wisli. - Oo, in toking kun ta sensu ga yok ya, - Alisa shwo denadi-nem, - ta es ya ga idiotalik. - Ewalaa ela ofni dwar e go inu. Toy dwar dukti rek inu gran kukishamba in kel ye ga mucho fum. Dukina zai sidi on tri-gamba-ney stula pa mida al luli bebi; un kuker zai inklini swa sobre agni al virti-mixi koysa in gran kazan. Semblem it es fule de sup. [[File:Alice par John Tenniel 21.png|Alice par John Tenniel 21|500px]] "Sertem... chih!... in sey sup ye tro mucho pepa... chih!..." - Alisa shwo a swa, obwol to bu es fasile por en-chihi gro. Amini in <i>aira</i> pepa es verem tro mucho. Iven Dukina chihi koyves; e bebi, ta nau chihi nau wuli oltaim, ga sin pausa. Ye sol dwa kreatura kel <i>bu</i> chihi: to es kuker e gran kota kel zai lagi on ochak al hev gro-smaila fon un aur til otre-la. - Plis, ob yu wud mog expliki a me - Alisa shwo idyen timidem por ke ela bu es serte ob es basta latif tu shwo pa un-ney, - way yur kota smaili tak? - Es ya Chesher-Kota, - Dukina shwo. - Por se hi. Swina! Ela shwo sey laste worda kun tanto turan-ney forsa, ke Alisa hampi ek-salti; bat ela vidi tuy ke se fa-adresi a bebi, bu a ela; also ela kuraji shwo for: - Me bu jan-te ke Chesher-Kota sempre smaili. Pa fakta, me ga bu gwo jan ke kota <i>janmog</i> smaili. - Oli janmog - Dukina shwo, - e maiste smaili. - Me bu koni nul-la kel smaili, - Alisa shwo muy latifem al sta aika santush por pai fai toka. - Yu bu jan mucho, - Dukina shwo. - Es ya fakta. Alisa ga bu pri ton de sey remarka e dumi ke wud bi hao tu en-hev otre toka-tema. Duran ke ela trai selekti koy-la, kuker pren kazan do sup fon agni e tuy begin shwai-shwai ti ta mog ateni na olo an Dukina e bebi: un-nem kelke gual-muver flai, poy en-ye gro-pluva-si aus kukipot, pyata e otre bartan. Dukina bu atenti it iven wen it trefi ela; e bebi zai wuli yo tanto gro ke oni ga bu mog shwo ob ta sufri por darba. - Ay, <i>plis</i>, dumi ba om kwo yu zwo! - Alisa krai al salti-salti pa gro-dashat. - Ay, yus an suy <i>verguy</i> nos! - al ke un verem gran kukipot flai bli pas it e hampi mah it wek. - Si kadawan wud atenti swa-ney hi dela, - Dukina grumbli raukem, - munda wud roti mucho pyu kway kem al nau. - To sertem <i>bu</i> wud bi pyu hao, - Alisa shwo al joi gro por hev shansa fo diki idyen swa-ney jansa. - Sim dumi ba, kwo wud eventi a dey e nocha! Es ke duran dwashi-char ora arda fai un rota pa suy axa... - Axa, axa... chih!... acha, acha... - Dukina shwo. - Apropoo om acha, haki elay kapa wek! Alisa ek-kan kuker aika nokalmem fo samaji ob ta sal obedi, bat kuker zai mangi muvi-mixi sup e semblem bu audi. Also ela shwo for - Also duran dwashi-char ora... shayad... o mogbi shi-dwa? Me... - Oo, bye disturbi <i>me</i>! - Dukina shwo. - Me bu toleri sifras, e neva gwo! - Afte se ta snova begin luli bebi al gani luligana-si e al ek-sheiki ta gro pa fin de kada linia: <i>"Shatami ba yur syao boy E bati ta por chihi. Ta vexi yu, buhao boy, E pa intenta chihi."</i> REFRENA (in kel kuker e bebi en-ko-gani): "Wul! Wul! Wul!" Al gani dwa-ney strofa Dukina swingi-swingi bebi uupar-nich gro-fortem, e syao povre wan wuli tanto gro ke Alisa apena audi wordas: <i>"Me ya shatami ta, may boy, Me bati ta e kiki, Dabe ta jui pepa toy Ke sempre me apliki."</i> REFRENA <i>"Wul! Wul! Wul!"</i> - Walaa! Yu darfi luli ta idyen si yu yao! - Dukina shwo a Alisa al shwai bebi a ela. - Me mus go tayari swa fo plei kroket kun Regina. - Ewalaa ta hasti lopi aus shamba. Kuker lansi fraier afte ta, bat bu trefi. Alisa kapti bebi yedoh to bu es fasile sikom ta es syao kreatura do ajibe forma: suy gambas e brachas ragi aus a oli taraf. - "Yus kom marstara," - Alisa dumi. Sey syao wan farfari kom vapormashina e oltaim pligi e depligi swa, also Alisa majbur eforti gro iven fo sim teni ta. Tuy afte ke ela pai findi prave dao fo luli ta (kel es tu torsi ta inu noda-si e gro-teni suy desne aur e lefte peda bli mutu fo preventi detorsa), ela porti ta aus dom. - "Si me bu ve pren sey kinda kun swa" - Alisa dumi, - "li sertem ve kili ta afte para dey. Tu lyu ta hir wud maini kili ta." - Ela shwo sey laste worda lautem, e syao wan grugru-jawabi (ta kwiti chihi al sey taim). - Bye fai grugru, - Alisa shwo, - to bu es prave dao fo expresi swa. Bebi grugru snova e Alisa nokalmem kan suy fas fo samaji kwo ye. Sin duba ta hev <i>muy</i> uuparpligi-ney nos kel simili musla pyu kem den reale nos. Yoshi suy okos es nopinchanem syao fo bebi. Pa tota Alisa ga bu pri suy aspekta. - "Bat mogbi es sim por plaki," - ela dumi e ek-kan inu suy okos fo vidi ob haishi ye larma. Non, larma yok. - Si yu sal transformi inu swina, may kare, - Alisa shwo seriosem, - me ga bu ve fai dela kun yu. Remembi ba! - Povre syao wan ek-plaki snova (o ek-grugru, oni bu mog shwo exaktem), e li go for al silensi duran koy taim. [[File:Alice par John Tenniel 22.png|Alice par John Tenniel 22|400px]] Alisa yus begin dumi - "Wel, kwo me gai zwo kun sey kreatura al he bringi ta a dom?" - wen ta grugru snova, tanto lautem ke Alisa kan an suy fas alarmi-nem. Pa sey ves duba ga <i>yok</i>: ta es swina hi. Ewalaa ela samaji ke to wud bi aika absurde si ela ve porti ta for. Also ela lasi syao kreatura nich, e senti levifa al vidi ke ta kway troti wek inu shulin. - Al fa-adulte - ela shwo a swa, - ta wud bi gro-kurupe kinda; bat kom swina ta es ya aika jamile, segun may opina. - Ewalaa ela en-mediti om otre ti ela koni na kindas kel wud mog bikam ga hao swina. - Oni sol treba jan prave dao fo transformi li... - ela begin shwo a swa bat turan ek-fobi-ki por vidi Chesher-kota kel zai sidi on baum-brancha pa kelke stepa fon ela. [[File:Cheshire Cat Tenniel.png|Cheshire Cat Tenniel]] Kota en-smaili al vidi Alisa. Semblem ta sta pa hao muda, ela dumi; yedoh ta hev <i>muy</i> longe nakas e gro-menga denta, also ela senti ke gai trati ta kun respekta. - Chesher-Koti, - ela begin, aika timidem, sikom ela ga bu jan ob ta ve pri tal nam. Yedoh ta sim ek-smaili idyen pyu chaurem. - "Wel, es haishi santush." - Alisa dumi e shwo for: - Plis, bi karim fo shwo a me, pa kwel kamina me gai go fon hir? - Se dependi aika gro fon to, a wo yu yao lai, - Kota shwo. - Fo me es aika egale... - Alisa jawabi. - Dan es egale pa kwel kamina yu ve go, - Kota shwo. - ...si me sol pai lai a <i>koylok</i>, - Alisa adi kom explika. - Oo, yu sertem ve pai, - Kota repliki, - si yu pedi basta longem. Alisa senti ke oni bu mog negi se, e probi fai otre kwesta. - Kwel jenta habiti hir? - Pa <i>toy</i> taraf - Kota shwo al mavi desne pata, - Shapnik jivi. E pa <i>toy</i> taraf - al mavi otre pata, - da Marto-Tuza. Yu mog visiti den kel yu yao: li ambi es pagale. - Bat me bu yao komuniki kun pagale jenta, - Alisa remarki. - Oo, yu sim bu mog eviti se, - Kota shwo. - Nu oli es pagale hir. Me es pagale. Yu es pagale. - Komo yu jan ke me es pagale? - Alisa kwesti. - Yu sertem es, - Kota shwo, - pa otrem yu bu wud lai ahir. Alisa bu opini ke se pruvi enisa. Yedoh ela shwo for - E komo yu jan ke yu es pagale? - Fo beginsa, doga bu es pagale, - Kota shwo. - Ob yu konsenti? - Me admiti se, - Alisa shwo. - Wel, dan - Kota fai for, - yu samaji ya ke doga grauli al iri e mavi kauda al sta santush. Ewalaa <i>me</i> grauli al sta santush e mavi kauda al iri. Also me es pagale. - <i>Me</i> wud shwo ke yu urli, bu grauli, - Alisa shwo. - Yu mog nami se kom yu yao, - Kota shwo. - Ob yu sal plei kroket kun Regina sedey? - Me wud yao gro, - Alisa shwo, - bat me bu es inviten. - Yu ve vidi me dar, - Kota shwo e desapari. Alisa bu surprisi gro por se, sikom ela zai abyasi ya a ke ajibe kosa eventi. Duran ke ela haishi kan plasa wo ta he bi, ta apari snova, ga turan. - Apropoo, kwo eventi a toy bebi? - Kota shwo. - Me hampi fogeti kwesti om se. - Ta he transformi inu swina, - Alisa jawabi muy kalmem kom si Kota lai bak pa ga pinchan dao. - Me dumi-te tak hi, - Kota shwo e fa-wek snova. Alisa weiti idyen al haf-expekti vidi ta snova, bat ta bu apari, also afte para minuta Alisa en-pedi a ti Marto-Tuza muka jivi na direksion. - Me gwo vidi koy shapnik bifooen, - ela shwo a swa. - Marto-Tuza semblem ve bi pyu interes-ney. Sikom es mey, mogbi ta bu es yo gro-pagale; amini bu tanto pagale kom pa marto. - Al shwo se ela ek-kan uupar, ewalaa Kota snova zai sidi pa baum-brancha. - Ob yu he shwo ‘swina’ o ‘pina’? - Kota shwo. - Me he shwo ‘swina’, - Alisa jawabi, - e me fai magari om ke yu bu apari e desapari oltaim tanto turan-nem: oni ya pai vertiga! - Hao, - Kota shwo. Pa sey ves ta desapari aika lentem, begin-yen bay kauda-nok e fini-yen bay smaila kel resti in aira fo kelke taim afte ke olo otre yo fa-wek. [[File:Alice par John Tenniel 24.png|Alice par John Tenniel 24|400px]] "Wel, me oftem gwo vidi kota sin smaila," - Alisa dumi, - "bat smaila hi sin kota! Es ya zuy kuriose kosa ke me gwo vidi duran may tote jiva!" Ela en-pedi snova e sun vidi dom de Marto-Tuza. Ela dumi ke musbi es toy hi dom, bikos fumtubas hev forma de aur e ruf es kovren bay farwa. Sey dom es tanto gran ke ela bu osi blisifi til kusi-chi idyen de desne-handa-ney funga-pes e mah swa sirke dwa fut gao. E iven afte se ela go versu it aika timidem al shwo a swa: - Yedoh, kwo si ta es gro-pagale hi? Magari-si me he go visiti Shapnik! [[Alisa in Divalanda|Kontena]] [[Alisa in Divalanda. Chapta 5|Chapta 5]] [[Alisa in Divalanda. Chapta 7|Chapta 7]]

Return to Alisa in Divalanda. Chapta 6.