Kan sursa

= LANGUSTA-KWADRILA = Kwasi-Tortuga gro-sospiri e froti okos bay swimala. Ta ek-kan Alisa e probi shwo, bat ga bu mog duran para minuta: plaking tufi suy vos. "Es kom si ta hev osta-ki fa-bloken in gorla" - Grifon shwo e begin sheiki ta e darbi ta an bey. Pa fin Kwasi-Tortuga snova en-hev vos e shwo for, al ke larma flui nich wangas: "Yu shayad bu gwo jivi longem sub mar - " ("Neva" - Alisa shwo) - "e shayad yu iven bu gwo gei prisenti a langusta (Alisa begin shwo "Unves me gwo gusti...", bat tuy hasti stopi e shwo "Non, neva") - "also yu shayad ga bu jan komo priate Langusta-kwadrila es!" "Verem non" - Alisa shwo. "Es dansa do kwel sorta?" "Wel" - Grifon shwo - "un-nem oni en-stan pa un longe linia along mar-sahil..." "Dwa linia!" Kwasi-Tortuga krai. "Fok, tortuga, salmon e tak for. Poy, afte ke oni mah-wek medusa fon dansa-dao..." "Se pinchanem duri kelkem" - Grifon interrupti. "...oni fai dwa stepa avan..." "Kadawan kun langusta to partner!" - Grifon krai. "Sertem," - Kwasi-Tortuga shwo - "fai dwa stepa avan, turni a otre para..." "...intershanji langusta e returni pa same ordina" - Grifon kontinu. "Poy, yu jan ya" - Kwasi-Tortuga fai for - "oni lansi..." "Langusta!" - Grifon krai al ek-salti gao. "...zuy dalem posible inu mar..." "Swimi afte ta!" Grifon krai. "Fai kalaba inen mar!" Kwasi-Tortuga krai al salti-dansi sirkum. "Intershanji langusta snova!" Grifon krai-skwili pa ol mogsa. "Snova bak a sahil e... walaa fin de un-ney parta" - Kwasi-Tortuga shwo al turan fa-kyete; ewalaa dwa kreatura kel yus he zai salti aika pagalem, en-sidi al sta muy triste e kyete snova, e kan Alisa. "To musbi es muy jamile dansa" - Alisa shwo timidem. "Ob yu wud yao vidi idyen de it?" - Kwasi-Tortuga kwesti. "Ya, verem" - Alisa shwo. "Aida, nu probi ba fai un-ney parta!" Kwasi-Tortuga shwo a Grifon. "Nu mog duyfu sin langusta, yu samaji ya. Hu ve gani?" "Oo, yu hi gani" - Grifon shwo. - "Me he fogeti wordas." E li en-dansi solemnem sirkum e sirkum Alisa, oftem stepi-yen on Alisa-ney pedas al pasi tro blisem e ondi-yen swa-ney avanpatas fo marki ritma, al ke Kwasi-Tortuga gani lo sekwi-she, ga lentem e tristem: Un merlan a slika shwo-te: “Pregi, muvi ba pyu kway! Ye un midia yus baken, ta zai topti kauda may. Kan, langusta e tortuga oli yao-shem avans’! On sahil li oli weiti. Ob yu lai e toshi dans’? Ob yu yao o bu yao hunti a nuy dans’? Ob yu yao o bu yao hunti a nuy dans’? Es priate, ga priate, hao-sta-ke tu bi dar Wen li pren yu e ek-lansi, kun langusta, inu mar!” Slika shwo: “Tro dalem, dalem! Verem, bu es hao shans’. Me gro-danki yu, merlan-ki, bat bu hunti a yur dans’. Me bu mog ya, me bu yao hunti a yur dans’. Me bu mog ya, me bu yao hunti a yur dans’. “Bu muhimi tu bi dalem,” shwo amiga do kaskas’. “Sey sahil ya bu es sole, ye i otre enikas. Kem pyu dale yu fon Ingland, tem pyu blise yu a Frans. Bye palifi, kare slika, lai e hunti a nuy dans. Lai ba, kara, lai ba, kara, hunti a nuy dans’! Lai ba, kara, lai ba, kara, hunti a nuy dans’! "Danke, es ya muy interes-ney dansa fo kan" - Alisa shwo al gro-joi por ke it stopi pa fin. "E me ya pri sey drole gana om merlan-fish.” "Oo, apropoo om merlan-fish" - Kwasi-Tortuga shwo – "ta... yu gwo vidi ta sertem, bu ver?" "Ver" - Alisa shwo - "Me oftem gwo vidi ta pa deyf..."e ela hasti stopi. "Me bu jan wo sey Deyf mog loki" - Kwasi-Tortuga shwo - "bat si yu gwo vidi ta, dan yu sertem jan komo ta aspekti." "Ya, shayad" - Alisa jawabi mediti-shem. "Ta es sin kaskasa... e ye menga kruma sirkum." "Yu galti om kruma" - Kwasi-Tortuga shwo - "li oli wud bi wekwoshen in mar. Bat ta verem mog bi sin kaskasa pa pluri plasa; kausa es ke..." - ewalaa Kwasi-Tortuga guapi e klosi okos. "Rakonti ba a ela om kausa e olo otre" - ta shwo a Grifon. "Kausa es" - Grifon shwo - "ke wen oni dansi kun langusta oni mog gei pinsi bay klemika kasualem. Bu oli langusta es kushale partner, yu samaji ya." "Danke" - Alisa shwo - "es ya muy interes-ney. Me bu gwo jan tanto mucho om merlan bifooen." "Me mog rakonti yoshi pyu, si yu yao." Grifon shwo. “Ob yu jan way oni nami ta merlan?” “Me neva gwo dumi om to”. - Alisa shwo. - “Way?” “Ta es lan, merkivalem lan. Unves habiter de un koral-ney urba elekti ta kom mer. Bat ta es tro lan fo gun, e oli shwo: 'mer es lan', 'mer lan', 'mer lan'. Tak hi suy nam en-ye.” Alisa dumi idyen. “Yedoh in gana ta sembli ga aktive”. “Es ver” - Grifon shwo - “bat in maiste otre situasion ta es lan, mlan e fai merlankolia”. “Yu maini 'melankolia' ku?” - Alisa kwesti. “Den melankolia oni fai on landa” - Grifon jawabi pa nise vos, - “E in mar oni fai merlankolia.” “Si me hi wud bi merlan” - shwo Alisa kel-ney duma haishi resti pa gana - “me wud shwo a midia: 'Atarafi ba plis! Nu fai stepa e nu bu treba nul midia!'” “Bat oni treba koy midia al fai stepa” - Kwasi-Tortuga shwo. “Ver ku?” - Alisa fa-surprisi. “Naturalem,” - Kwasi-Tortuga shwo. - “Wen koywan lai a me e shwo ke ta yao fai sertene stepa, me sempre kwesti: 'Bay kwel midia?'” “Yu maini 'media' ku?” - Alisa shwo. "Me maini to ke me shwo" - Kwasi-Tortuga jawabi ofensi-nem. E Grifon adi: "Kamon, rakonti ba idyen om yur aventuras." "Me wud mog rakonti may aventuras - las depos sey sabah" - Alisa shwo idyen timidem, "bat bu ye sensu in rakonti om yeri-ney-las, bikos dan me bin otre persona." "Expliki ba se olo" - Kwasi-Tortuga shwo. "Non, non! Un-nem aventuras," Grifon shwo sinsabrem. "Explikas sempre duri gro." Also Alisa begin rakonti a li swa-ney aventuras depos taim wen ela miti Blan Kunila. Pa beginsa ela sta idyen nerva-ney, sikom dwa kreatura zai sidi tanto blisem pa ambi flanka e ley okos e muhes es ofnen tanto chaurem, bat poy ela fa-kuraje. Elay slu-sha sta ga kyete til ke ela ateni parta om komo ela deklami "Patra Wiliam" a Katapila, e wordas chu ga nopravem, ewalaa Kwasi-Tortuga fai longe sospira e shwo "Es muy ajibe." "Es ya sirke tanto ajibe kwanto it mog bi" - Grifon shwo. "Olo chu nopravem!" Kwasi-Tortuga repeti dumi-shem. "Me wud yao ke ela probi deklami koysa nau. Shwo ba a ela, hay ela begin." Ta kan Grifon tak kwasi toy-la es persona do koy autoritaa fo Alisa. "En-stan ba e deklami "'Walaa vos de toy lannik'" - Grifon shwo. "Oli sey kreatura ya komandi tanto, e mah oni repeti leson!" - Alisa dumi. - "Es ya exaktem kom pa skola." Yedoh ela en-stan e begin deklami, bat inen elay kapa ye tanto mucho kosa fon Langusta-kwadrila, ke ela apena jan kwo ela zai shwo, also worda chu verem aika ajibe: Walaa vos de Langusta – ta deklari lo tal: “Yu he peki me tro, me es ga kom gual”. Bay suy nos ta rasmuvi swa-ney peda-ney nok E mah-glan suy buton, dabe kajal ga yok. Al defluisa pa chyenlok ta alegre es gro E kun bicha om sharka i dumi i shwo. Lai afluisa kun sharkas – dan ta es pyu sanyam E suy vos tremishil e timide bikam. "Se farki ya fon to ke me gwo deklami al bi kinda" - Grifon shwo. "Wel, me iven bu gwo audi se bifooen" - Kwasi-Tortuga shwo - "bat se suoni kom nopinchan absurdika." Alisa bu shwo nixa. Ela sim en-sidi e kovri fas bay handas, al dumi ob koytaim olo ve snova eventi pa normale dao. "Me wud yao ke se gei expliki" - Kwasi-Tortuga shwo. "Ela bu mog expliki se" Grifon hasti shwo. "Fai for, deklami sekwi-she versa." "Hay ela expliki amini 'rasmuvi swa-ney peda-ney nok'” - Kwasi-Tortuga insisti. - “Komo es posible ke ta rasmuvi pedanok bay nos?” "Mogbi ta yao fai un-ney posision de dansing" - Alisa shwo. Bat pa fakta ela gro-yao shanji tema, ela ya sta ga perplexe por se olo. "Deklami ba dwa-ney versa" Grifon repeti sinsabrem. "It begin pa 'Wen me pasi suy garden'”. Alisa bu osi desobedi, obwol ela presenti ke wordas sertem sal chu nopravem, e deklami bay tremi-she vos: Wen me pasi suy garden, dan vidi me pai Komo Ulu e Tigra dividi gran pay. Tigra pren pay-ney krosta i masu i saus Ulu pren sol toy pyata ke Tigra shwai aus. Poy, wen pay es yo chi-ney e Tigra swa wosh’, Ta permiti ke Ulu pon chiza in posh, Bat ta selfa pren otre chitul afte kaulu E ta fini banket bay turan... "Kwel es haotaa de deklami ol sey deklamika" - Kwasi-Tortuga interrupti - "si yu bu mog expliki it? Es ya zuy konfusi-she kosa ke me gwo audi!" "Ya, me dumi ke wud bi pyu hao tu kwiti se" - Grifon shwo, al ke Alisa joi. "Ob nu probi fai otre parta de Langusta-kwadrila? - Grifon shwo for. - "O mogbi yu wud yao ke Kwasi-Tortuga gani otre gana fo yu?" "Oo, ya, gana hi, plis, si Kwasi-Tortuga ve bi tanto karim" - Alisa jawabi tanto yao-shem ke Grifon sol ek-lifti plechas, idyen ofensi-nem: "Hm! Om gusta oni bu disputi. Gayar, gani ba 'Tortuga-ney sup' a ela, hao ku?" Kwasi-Tortuga sospiri gro e en-gani al ek-gro-plaki koyves: Blesi-ney sup, sam grin kom osean, Gro-riche sup, yu weiti in supdan. Den kadawan-ney duma yu okup’, Sup may aksham-ney, blesi-ney sup! Sup may aksham-ney, blesi-ney sup! Bleeesi-ney suuup! Bleeesi-ney suuup! Suuup may akshaaam-ney, Blesi-ney, blesi-ney sup! Blesi-ney sup! Hu yao chi den fish O den shikar o eni otre dish? Hu bu wud dai kwo unkwe ga abrup- tem dabe gusti blesi-ney sey sup? Amini gusti blesi-ney sey sup! Bleeesi-ney suuup! Bleeesi-ney suuup! Suuup may akshaaam-ney, Blesi-ney, blesi-NEY SUP! “Yoshi un refrena!" Grifon krai, e Kwasi-Tortuga yus begin repeti it, wen kraisa "Hakma begin!" fa-audi fon dalitaa. "Aida!" Grifon krai, pren Alisa-ney handa e hasti-go wek sin weiti til ke gana fini. "Kwel hakma es?" Alisa kwesti al lopi e spiri gro. Bat Grifon sol repeti "Aida! Aida!" e lopi oltaim pyu kway, duran ke triste wordas de gana bay Kwasi-Tortuga fadi pyu e pyu, porti-ney wek bay feng: Suuup may akshaaam-ney, Blesi-ney, blesi-ney sup!

Return to Alisa in Divalanda. Chapta 10.