Kan sursa

= PAGALE CHAYVATING = Bifoo dom sub baum ye bepon-ney tabla e Marto-Tuza e Shapnik zai chayvati pa it; Somnimaus zai sidi inter li al haf-somni. Ambi otra zai yusi ta kom kushen – li apogi kudas on ta e zai toki sobre ta-ney kapa. "Musbi es muy nobyen fo Somnimaus" Alisa dumi. "Yedoh ta somni e shayad bu atenti." Tabla es aika gran, bat li tri zai sidi pa hunta pa un angula. "Plasa yok! Plasa yok!" li krai al vidi ke Alisa zai lai. "Ye menga plasa!" Alisa shwo indignem e en-sidi inu gran brachastula pa un de tabla-fin. "Pi ba idyen vino," Marto-Tuza shwo kwasi al mah-kuraje. Alisa kan olo on tabla, bat ye nixa krome chay. "Me bu vidi vino," ela remarki. "It yok," Marto-Tuza shwo. "Dan bu es muy latif ke yu ofri it,"Alisa shwo ira-nem. "Bu es muy latif ke yu en-sidi pa tabla sin ke oni inviti yu," Marto-Tuza jawabi. "Me bu jan-te ke es tabla sol fo yu hi," Alisa shwo. "Ye bartan fo mucho pyu kem tri wan." "Yu treba kati har," Shapnik shwo. Ta he kan Alisa fo kelke taim gro-jigyas-nem e se es suy un-ney worda. "Yu gai lerni bu fai remarka om persona de kunshwoer," Alisa shwo idyen saktem. "Es muy karke." Al audi se, Shapnik ofni okos ga chaurem bat bu repliki. Ta kwesti sol: "Way korva simili skribitabla?" "Aa, nu sal fa-amusi idyen!" Alisa dumi. "Me joi ke li begin fai enigma.” “Me kredi ke me mog gesi", ela adi lautem. "Ob yu maini ke yu dumi ke yu mog findi resolva?" Marto-Tuza shwo. "Exaktem," Aisa shwo. "Dan yu gai shwo to ke yu maini," Marto-Tuza shwo for. "Me fai tak," Alisa hasti repliki. "Amini... amini me maini to ke me shwo... es sama, yu jan ya." "Ga bu es sama!" Shapnik shwo. "Wel, yu yoshi wud mog ya shwo ke 'Me vidi to ke me chi' es sama kom 'Me chi to ke me vidi'!" "Yu yoshi wud mog shwo," Marto-Tuza adi, "ke 'Me pri to ke me pai' es sama kom 'Me pai to ke me pri'!" "Yu yoshi wud mog shwo," Somnimaus adi - ta semblem toki al somni - "ke 'Me spiri duran ke me somni' es sama kom 'Me somni duran ke me spiri'!" "Fo yu es ya sama hi," Shapnik shwo, e toka stopi. Oli silensi duran un minuta. Alisa zai bedumi olo ke ela remembi om korva e skribitabla, bat to bu es mucho. Shapnik defai silensa pa un-ney. "Kwel dey de mes es sedey?" ta shwo al turni swa a Alisa. Ta he tiri-pren kloka aus posh e zai kan it alarmi-nem al sheiki-sheiki it e al teni it bli aur. Alisa mediti idyen, shwo: "Char-ney-la." "Galti pa dwa dey!" Shapnik sospiri. Poy ta kan Marto-Tuza ira-nem, adi: "Me ya he shwo a yu ke nayu bu godi fo mekanisma!" "Ti bin zuy hao nayu," Marto-Tuza jawabi namrem. "Ver, bat koy kruma shayad geti inu," Shapnik grumbli. "Yu bu gai-te mah it inu bay pan-sikin." Marto-Tuza pren kloka e kan it glumem. Poy ta ek-makni it inu tasa kun chay e snova kan; bat ta bu mog inventi koysa pyu hao kem repeti swa-ney un-ney remarka: "To bin zuy hao nayu, yu jan ya." Alisa kan sobre suy plecha aika jigyas-nem. "Es ya drole kloka!" ela remarki. "It indiki dey de mes e bu indiki kwel klok es!" "Ob it gai?" Shapnik murmuri. "Mogbi yur kloka indiki kwel yar es?" "Sertem non," Alisa jawabi muy yao-shem, "bat es bikos same yar resti gro-longem." "Sama she may-la," Shapnik shwo. Alisa fa-gro-perplexe. Remarka de Shapnik semblem bu hev ga nul sensu, yedoh sertem es shwo-ney pravem. "Me bu fulem samaji yu," ela shwo zuy latifem posible. "Somnimaus zai somni snova," Shapnik shwo e liti idyen garme chay on suy nos. Somnimaus ek-sheiki kapa nosantushem e shwo sin ofni okos: "Ver, ver, sertem. Den se hi me selfa yus yao-te shwo." "Ob yu he resolvi enigma?" Shapnik shwo al turni swa a Alisa. "Non, me tausian," Alisa jawabi. "Kwel es resolva?" "Nul idea ga yok," Shapnik shwo. "She me sama," Marto-Tuza shwo. Alisa sospiri tedi-nem. "Me opini ke yu wud mog zwo koysa pyu hao kun taim," ela shwo, "kem vanisi it al fai enigma kel bu hev nul resolva." "Si yu wud koni den Taim sam hao kom da me," Shapnik shwo, "yu bu wud shwo om vanisi it. Es Ta." "Me bu samaji," Alisa shwo. "Naturalem!" Shapnik shwo al ek-sheiki kapa kun bicha. "Me es serte ke yu iven bu gwo toki kun Taim!" "Shayad non," Alisa jawabi chaukem. "Bat me plurives gwo dumi komo kili taim." "Aa! Se expliki olo,"Shapnik shwo. "Ta bu toleri wen oni yao kili ta. Wel, si yu wud trati ta hao, ta wud mog zwo kwo unkwe yu yao an kloka. Pa exampla, imajini ba ke es klok nin pa sabah, taim fo begin leson; yu treba sol hamsi-anshi a Taim, ewalaa diker en-roti kway! Afte un taiminka - klok un e haf, taim fo deyfan!" ("Me mog sol fai magari om to," Marto-Tuza hamsi-shwo a swa.) "To sertem wud bi gro-hao," Alisa shwo al mediti. "Bat.. me bu wud fai hunga, dan." "Shayad bu tuy," Shapnik shwo, "bat yu wud mog kipi klok un e haf fo tanto longem kom yu yao." "Ob yu pai zwo tak hi?" Alisa kwesti. Shapnik sheiki kapa griva-nem. "Bu me!" ta jawabi. "Nu kwereli pa mes-tri - yus bifoo ke sey wan fa-pagale, ver ya..." (al indiki Marto-Tuza bay chaychiza.) "To bin pa gran konserta ke Regina do Kordia dai, e me mus gani: Glimi, glimi, watwat syao! Kwo yu zun - se jan me yao. (Glimi, glimi, stara syao! Kwo yu es - se jan me yao. ) Shayad yu koni sey gana, bu ver? "Me gwo audi koysa simile," Alisa shwo. "Wel, lo for es tal," Shapnik kontinu: Sobre munda yu zai flai, kom talam do chay in skay. (Sobre munda yu zai flai, kom diamanta-ki in skay. ) Ewalaa Somnimaus sheiki swa e en-gani somni-yen "glimi, glimi, glimi, glimi..." e fai for tanto longem ke li majbur pinsi ta fo mah-stopi. "Wel, me he apena fini un-ney strofa," Shapnik shwo, "wen Regina ek-brai: "Lu zai kili taim! Mah luy kapa wek!" "Gro-savaje ya!" Alisa exklami. "E depos dan," Shapnik shwo for grivem, "ta bu yao zwo nixa fo me! She nu es sempre klok sis." Turan Alisa ek-gesi. "Por to hi ku ye tanto mucho chay-bartan hir?" ela kwesti. "Ver, to es ya kausa," Shapnik sospiri. "Oltaim es chay-taim, also taim fo woshi bartan yok." "Also yu intershanji plasa pa ronda, bu ver?" Alisa suposi. "Exaktem," Shapnik shwo, "segun ke bartan gei finyusi." "Bat kwo eventi wen yu snova ateni beginsa?" Alisa kuraji kwesti. "Hay nu shanji tema," Marto-Tuza interrupti guapi-yen. "Me fa-tedi por sey-la. Me opini ke yunge mis treba rakonti koy historia a nu." "Me fobi ke me bu jan eni-la," Alisa shwo, idyen alarmi-ney. "Dan Somnimaus rakonti!" li ambi krai. "Somnimaus, en-jagi ba!" Li tuy pinsi ta pa ambi taraf. Somnimaus ofni okos, ga sin hasta. "Me bu he somni," ta feblem raukefai. "Me he audi kada worda ke yu shwo." "Rakonti ba historia!" Marto-Tuza shwo. "Ver, bi karim ya!" Alisa gro-pregi. "Tuy ya," Shapnik adi, "otrem yu en-somni bifoo fin." "Unves ye tri sista-ki," Somnimaus begin al hasti gro, "kel nami Elsi, Lisi e Mati. Li jivi pa kwan-diba." "Kwo li chi?" Alisa kwesti sikom ela sempre fai interes om chia e pia. "Li chi melasa," Somnimaus shwo afte dumi duran kelke minuta. "Li bu mog-te ya," Alisa remarki mulem. "Li wud en-morbi." "Li en-morbi hi," Somnimaus shwo. "Li en-morbi gro." Alisa trai imajini toy nopinchan jiva, bat to konfusi ela tro, also ela shwo for: "Way hi li jivi pa kwan-diba?" "Pi ba pyu chay," Marto-Tuza shwo gambirem. "Me haishi he pi nixa" Alisa jawabi ofensi-nem, "also me bu mog pi pyu." "Yu maini ya ke yu bu mog pi meno," Shapnik shwo. "Tu pi pyu kem nixa es ya fasile." "Nulwan kwesti om yur opina," Alisa shwo. "Hu hi zai fai remarka om persona de kunshwoer nau?" Shapnik kwesti triumfi-shem. Alisa bu jan hao kwo jawabi, also ela pi idyen chay e chi idyen pan kun nayu. Poy ela turni a Somnimaus e repeti: "Way li jivi pa kwan-diba?" Somnimaus snova dumi duran kelke minuta, poy shwo, "To es melasa-kwan." "Tal kosa yok ya!" Alisa en-shwo ira-nem, bat Shapnik e Marto-Tuza fai "Shsh! Shsh" e Somnimaus glumem remarki: "Si yu bu janmog suluki hao, fini ba sey historia pa selfa." “Non, non, bi karim, fai for!" Alisa shwo ga namrem. "Me bu ve interrupti yu. Me bu jan sertem, mogbi koylok ye un hi tal kwan." "Un hi!" Somnimaus shwo indignem, yedoh konsenti fai for. "Also tri sista-ki - li lerni rasmi e cherpi..." "Cherpi inspira ku?" Alisa kwesti fogeti-yen suy wada. "Melasa," Somnimaus shwo, pa sey ves sin dumi. "Me treba klin tasa," Shapnik interrupti. "Nu muvi ba pa un plasa." Ta shanji plasa duran shwo, Somnimaus sekwi ta; Marto-Tuza okupi plasa de Somnimaus e Alisa, ga sin yao, majbur okupi Marto-Tuza-ney-la. Sol Shapnik pai avantaja por plasa-shanja, e Alisa-ney situasion es nau mucho pyu buhao bikos Marto-Tuza yus he lasi lwo milka-kruga inu suy pyata. Alisa bu yao ofensi Somnimaus snova, also en-shwo muy chaukem: "Bat me bu samaji. Fon wo li cherpi melasa?" "Oni mog cherpi akwa aus akwa-kwan," Shapnik shwo, "also oni mog cherpi melasa aus melasa-kwan, bu ver? Stupida ya..." "Bat li es ya inen kwan," Alisa shwo a Somnimaus al preferi bu atenti laste remarka. "Naturalem," Somnimaus shwo, "inen kwanto treba.” Sey jawaba konfusi Alisa tanto ke ela lasi Somnimaus shwo for fo kelke taim sin interrupti ta. "Li lerni rasmi," Somnimaus kontinu al guapi e froti okos, bikos ta fa-somnaful, "e li rasmi oli kosa kel begin bay M..." "Way M?" Alisa kwesti. "Way non?" Marto-Tuza shwo. Alisa silensi. Somnimaus he yo klosi okos e zai en-somni, bat al senti pinsa de Shapnik ta ek-krai e snova en-jagi. Also ta fai for: "...kel begin bay M: maus-kaptika, mar, memoria, menga... Oni shwo ya "menga de koysa", bat ob yu gwo vidi rasma de menga selfa?" "Pa fakta, sikom yu kwesti," Alisa shwo, ga konfusi-ney, "me bu dumi..." "Dan bu gai shwo," Shapnik interrupti. Sey karkitaa es tro fo Alisa: ela en-stan, gro-vexi-ney, e go wek. Somnimaus en-somni tuy, e ambi otra fai nul atenta om ke ela go, obwol ela kan bak para ves al haf-nadi ke li voki ela bak. Pa laste ves ke ela vidi li, li zai trai pon Somnimaus inu chaydan.

Return to Alisa in Divalanda. Chapta 7.