Kan sursa

''bay lorda Danseni (Lord Dunsany)'' ''(tradukten bay Stiv Rais)'' Haron inklini avan e remi. Oli kosa es lo un por luy fatiga. Fo lu dela bu gwansi yares oda seklas, bat chaure stromes de taim, e lao gravitaa e tunga in brachas he bikam fo lu parta de toy ordina ke bohes he zwo-te e kel es sama kom Eternitaa. Si bohes iven wud sendi a lu kontra-ney feng, to wud parti ol taim in luy memoria inu dwa egale haf. Oli kosa sirkum lu es oltaim tanto grey, ke si koy luma wud deri fo momenta miden mortes, iven on fas de tal regina kom Kleopatra, luy okos bu wud mog persepti it. Es strane ke mortes al nau lai po tanto mucho. Po miles hi, e li gwo lai po petshis. Bu es ni Haron-ney deba ni abyas tu mediti inen swa-ney grey atma om way eventi tak. Haron inklini ya avan e remi. Poy nulwan lai duran kelke taim. Bu es pinchan ke bohes bu sendi nulwan nich fon Arda fo tanto longe taim. Bat bohes jan pyu hao. Poy un jen lai solem. Kom syao fantom ta en-sidi tremi-yen on sinjen-ney bencha, e gran bota departi fon sahil. Sol un ge musafer... Bat bohes jan ya pyu hao. E gran e fatige Haron remi for e for bli toy syao, silense, tremi-she fantom. E suon de riva es kom gro-sospira ke Griva fai al bi miden suy sistas, Griva kel bu mog morti kom ehos de jen-ney griva fadi-she on arda-ney kolinas, bat kel es sam lao kom taim e kom tunga in Haron-ney brachas. Poy bota fon lente, grey riva lai a sahil, e syao, silense fantom, haishi tremi-yen, stepi on grunta, e Haron turni bota fo go fatigem bak a munda. Dan syao fantom shwo ke ta bin jen. "Me es laste," lu shwo. Nulwan enives gwo mah Haron smaili bifooen, nulwan bifooen enives gwo mah lu plaki. [[Category:Rakonta]]

Return to Haron.