Anekdot (nivel 1)

From Lidepla Wiki
Revision as of 16:51, 6 July 2014 by Sunnynai (Diskusa | contribs)
(diff) ← Older revision | Latest revision (diff) | Newer revision → (diff)
Jump to: navigation, search

Contents

1

Jimi jivi in vilaja e ta pri plei in muy chyen riva bli dom; poy ta-ney patra pai gunsa in un gran urba, e ta en-habiti dar kun ta-ney familia tuhun. Ley nove dom hev garden, bat toy garden es muy syao. Jimi bu joi. "Ob ye riva hir?" ta kwesti mata pa un-ney sabah. Mata jawabi: "Non, riva yok, bat ye jamile parka, Jimi, e in parka ye chitan. Nu ve go adar sedey afte deyfan." Dan Jimi joi gro. Afte deyfan Jimi e ta-ney mata go a parka. Jimi yao promeni bli chitan, bat bifoo it ye signa. Mata lekti: "WARNA: Sey chitan es danjaful. 367 jen yo he lwo inu it." Jimi kan chitan gro-atentem. Poy ta shwo: "Me bu vidi li."

2

Madam Grin es lao dama. Ela safari oftem e ela bu fobi flai bay avion. Unves ela flai-go fon Chikago a San-Fransisko bay un gran avion. Ye mucho vakue sidika. Madam-Grin-ney sidika es bli winda. Pa otre fin de sidika-fila ye un yunge man. Lu toshi es bli winda. Madam Grin ek-kan an yungo kelke ves. "Ta oltaim kan traen-winda-ney motor," ela dumi. Ela en-stan e promeni ahir-adar pa avion duran kelke minuta. Poy ela en-sidi e snova ek-kan an yunge man. "Ya", ela dumi, "ta kuydi kan motor oltaim." Afte haf-ora madam Grin go-lai a ta e shwo: "Promeni ba idyen pa avion, yunge man. Me sal kuydi kan motor pur yu duran kelke minuta."

3

Es sitdey-sabah de mes-pet. Afte ofni kurtena e kan tra winda, madam Edwards smaili e shwo: "Sey dey sal bi gro-hao!" Ela jagisi swa-ney syao son pa klok ot-e-haf. Ela shwo a ta: "En-jagi ba, Tedi. Nu sal go a zoo sedey. Woshi ba handas e fas, brashi denta e kway chi sabahfan. Nu sal go a Nuy-York bay tren." Tedi hev sit yar. Ta joi gro, bikos ta gro-pri go a zoo e yoshi ta gro-pri raki tren. Ta shwo: "Me sonji om zoo pa sey nocha, Mama." Ta-ney mata hasti gro, bat stopi e smaili a swa-ney son-ki. "Ver ku, Tedi?" ela shwo. "E kwo yu zwo-te in zoo in yur sonja?" Tedi ridi e jawabi: "Yu jan ya, Mama! Yu toshi bin in may sonja."

4

Poli en-go a skola al hev sit yar. Ela gro-pri un-ney skola-dey. Elay talimer mis Yati es muy prival, e oli otre kinda in klas es prival toshi. Bat pa dwa-ney dey, afte ke oli leson fini e oli kinda chu lernishamba, Poli resti e en-weiti. Mis Yati hev mucho dela e bu merki Poli pa beginsa, bat poy ela lifti kapa e en-vidi ela. "Way yu be he go kun otres, Poli?" ela kwesti karimem. "Ob yu yao fai kwesta a me?" "Ya, mis Yati," Poli shwo. "Kwo ye?" mis Yati kwesti. "Kwo me zwo-te in skola sedey?" Poli shwo. Mis Yati ridi. "Kwo yu zwo-te in skola sedey?" ela shwo. "Way yu kwesti me om se, Poli?" "Bikos me sal go a dom nau," Poli jawabi, "e may mata sal kwesti me."

5

Jini safari pa Nuy-Ingland bay auto. Unves ela stopi in syao vilaja dabe kan jamile lao kirka. Bifoo it ye kabralok, e un lao man zai rasti gras sirkum kabras. Jini chu auto, zin kabralok e kan kelke kabra. Poy ela go-lai a lao man e shwo a ta: "Hao sabah! Sey vilaja, ob jenta oftem morti hir?" Lao man stopi gun fo kelke sekunda, kan Jini atentem, poy shwo: "Non, li morti un ves." Jini ridi al audi se, poy shwo a lao man: "Skusi. Me bu he shwo se pravem. Me sal kwesti otrem: 'Sey vilaja, ob mucho jenta morti hir?" Lao man snova stopi gun. "Ya," ta shwo, "li oli morti." Poy ta en-rasti gras snova.

6

Al hev trishi-pet yar, Jorj kupi syao avion e lerni flai-dukti it. Sun ta bikam gro-hao pilota e en-janmog mah swa-ney avion zwo farke truk. Jorj hev un amiga. Ta nami Mark. Undey Jorj ofri tu pren Mark inu avion. Mark dumi: "Me gwo safari bay gran avion pluri ves, bat me bu gwo bi in syao-la, also me ve probi." Li en-flai e flai duran haf-ora, e Jorj mah avion zwo truk do oli sorta. Afte lai nich, Mark joi gro por bi salim, e shwo a swa-ney amiga pa tremi-she vos: "Wel, Jorj, danke gro por sey dwa safara bay yur avion." Jorj fa-astoni gro, shwo: "Dwa ku safara?" "Ya, may un-ney-la e may laste-la," Mark jawabi.

7

Bili e Fred es universitet-studenta. Li es amiga. Li bu hev mucho mani. Also, wen vakasion-taim lai, Bili shwo: "Nu fai ba vakasion in autoshamba, Fred. Es pyu chipe kem in hotel. Me mog loni-pren may-patra-ney autoshamba." Fred joi gro e konsenti, also li geti inu autoshamba e begin fai vakasion. Li yao en-stam ranem pa sabah, bat kloka-jagiser yok. "Problema yok, Bili," Fred shwo. "Me ve pon kelke syao pan-pes on ruf de autoshamba bifoo go somni, e li ve jagisi nu pa sabah." Bili fa-astoni bat shwo nixa. Fred es prave. Al fa-sabah kelke syao faula flai-lai fo chi pan, e ley shum on ruf de autoshamba, it jagisi Bili e Fred muy kway.

8

Keti e Jeni go a skola pa hunta duran kelke yar e bin amiga. Keti hev meno-yash-ney sista, e Jeni bu hev nul brata-sista. Poy Keti e Jeni fini skola, e afte kelke yar li ambi gami e en-hev kinda. Li jivi dalem fon mutu. Li gro-mangi om swa-ney familia, also li bu vidi mutu til ke Keti-ney sista gami. Undey Keti e Jeni miti in urba-sentra al fai kuping. Li toki duran kelke taim, poy Jeni shwo: "Komo yur sista sta, kun swa-ney nove mursha?" "Oo, Jeni, ela sta hao," Keto jawabi kway. "Ye sol un problema-ki." "Oo. kwo es?" Jeni kwesti. "Wel, ela heni ta," Keti shwo. "Bat sempre om kada kosa ye koysa noprave, bu ver? Nixa es perfekte."

9

Ali Braun janmog repari dom-kosas gro-hao wen li fa-rupti. Unves ta go a otre urba fo fai koy gunsa dar, e ta-ney molya resti pa dom sole. Al ke sinior Braun es wek, kran in banishamba fa-rupti, also ela telefoni-voki akwayuan (???). Yuan lai pa aksham e repari kran in (??) kelke minuta. Afte fini, ta dai a madam Braun den bil pur gunsa. Ela kan it duran kelke sekunda, poy shwo: "Yur prais es tro gao, bu ver? Yu jan ku, iven ti lai a dom na leker kosti meno." "Ya, me jan se," yuan jawabi. "Me jan se muy hao, bikos me bin doktor bifoo ke me pai sey gunsa kelke mes bak."

10

Al bi skola-gela, Meri Smit yao-te bikam talimer, bikos ela gro-lubi kindas. Ewalaa al hev dwashi-un yar, ela begin talimi in syao skola. Ela es hao talimer, ela ridi mucho kun kindas tuhun. Li pri ela. Undey un gela de elay klas shwo: "Mis Smit, way man-ney har fa-grey bifoo ta-ney mustash e barba?" Meri ridi e jawabi: "Me bu jan, Helena. Way suy har fa-grey bifoo mustash e barba?" "Me toshi bu jan, Mis Smit," Helena jawabi, "bat eventi tak an may patra." Otre kindas in klas ridi al audi se. Poy un boy shwo: "Me jan, Mis Smit. Man-ney har sempre fa-grey pa un-ney bikos it es pa shi-sit yar pyu lao kem mustash e barba."

11

Moli bin sole gela pa elay gata, bat, al ke ela hev ot yar, otre gela en-habiti in kontra-ney dom. Nove gela toshi hev ot yar. Ela namo Joan. Joan hev dwa brata. Gelas bu go a same skola, bat li sun begin plei pa hunta afte skola. Undey Joan lai a dom, pi milka, chi biskwit, e poy go a Moli-ney dom. Ela shwo a swa-ney amiga: "Swasti, Moli. Yu lai-bu-lai a may dom fo plei? Me hev gro-hao nove geim." Moli jawabi: "Skusi, Joan, bat may mata bu permiti ke me plei kun yu sedey, bikos yur brata Jorj zai hev longitura, e ela bu yao ke me toshi pai it." "Oo, problema yok, Moli," Joan jawabi kway. "Pa fakta, Jorj bu es may vere brata. Ta es may stif-brata (????)."

12

Maik es syao boy, e ta heni sabun e akwa. Tri o char ves kada dey mata shwo a ta: maik, yur handas snova es muy gande. Go ba woshi li." Bat pa fakta Maik neva woshi li hao. Ta sol pon li inu akwa fo kelke sekunda e poy mah li aus snova. Onkla e tia de Maik jivi in otre urba. Undey li lai a she Maik-ney mata-patra, e ley syao son Ted lai kun li tuhun. Ted es pa un yar meno yash-ney kem Maik, e ta toshi heni sabun e akwa. Dwa boy resti in dom kun mata-patra duran kelke minuta, poy go aus. Al ke li es sole, Maik kan Ted-ney handas e shwo garwem: "May handas es pyu gande kem yur-las!" "Sertem," Ted jawabi ira-nem, "yu es ya pa un yar pyu lao kem me."

13

Piter hev shi yar. Undey ta-ney amiga Paul shwo a ta: "Piter, me sal hev janmadey-pati pa sitdi. Yu lai ku?" Piter kwesti mata, e ela shwo: "Ya, yu mog go." Ela telefoni a Paul-ney mata fo ladi olo. Bifoo ke Piter go a pati pa sitdi, ta-ney mata shwo a ta: "Piter, bye fogeti bi latif. Bye pregi chia. Weiti til ke oni dai it a yu." "Hao, mami," Piter jawabi, e go a she Paul bay bisikla. Pa pati ye mucho kinda. Li plei pa hunta duran un ora, poy Paul-ney mata dai a li koy chia, bat ela fogeti dai chia a Piter. Ta weiti latifem duran kelke taim, poy lifti swa-ney pyata e shwo lautem: "Ob koywan nidi prival klin pyata?"

14

Nora hev shi-sit yar. Ela hev syao brata. Elay-brata-ney nam es Jim. Koyves Jim shali gro, bat ta mah Nora ridi mucho, e ela lubi ta e es sempre karim versu ta. Undey ela zai go fon dom a shop, ewalaa ela vidi un syao boy kel zai lopi versu ela. Ta lopi muy kway. Wen ta blisifi, ela fa-astoni por vidi ke es Jim. "Swasti, Jim," Nora krai. "Way yu zai lopi tanto kway?" Jim bu stopi, bat mavi handa a sista e krai-jawabi: "Me zai trai reteni dwa boy fon batala." Nora fa-astoni snova. Ela ridi e shwo: "Es ya muhim zunsa fo syao boy, bu ver? Yu bu zwo tal dela oftem. Hu es sey dwa boy?" "Es Tom e me," Jim jawabi al lopi for muy kway along gata.

15

Henk jivi-te in syao urba. bat poy ta pai gunsa in gran urba e en-habiti dar kun swa-ney molya e dwa kinda tuhun. Pa un-ney sitdi in ley nove dom, Henk mah swa-ney nove auto aus garaja e zai woshi it, al ke ta-ney visin zai go pas. Al vidi Henk-ney nove auto, visin stopi e kan it duran un minuta. Poy Henk turni e vidi ta. Visin shwo: "Es ya prival auto. Ob es yu-ney?" "Koyves," Henk shwo. Visin fa-astoni. "Koyves ku?" ta shwo. "Kwo yu maini?" "Wel," Henk jawabi lentem, " wen ye pati in urba, it perteni a may docha Jein. Wen koylok ye futbal-match, it perteni a may son Jo. Afte ke me woshi it, ir aspekti muy prival e klin e perteni a may molya. E wen it nidi bensin, it es me-ney."

16

Alisa es gela do dwashi-tri yar. Ela es mednana in gran hospital. Ela es muy karim, e oli elay pasienta gro-pri ela. Undey ela zai fai kuping e vidi un lao gina kel zai weiti dabe pai krosi mange (?) gata. Alisa toshi yao krosi gata, also ela go-lai a toy lao gina fo ofri helpa. Afte blisifi, Alisa turan ridi e shwo: "Madam Herman! Yu bin may pasienta pa bifoo-ney yar!" Madam Herman joi gro por vidi ela. "Me ve helpi yu krosi gata, madam Herman," Alisa shwo. "Oo, danke gro, Alisa," madam Herman shwo e en-stepi avan. "Non, non, madam Herman," Alisa kway shwo. "Weiti ba! Semafor-luma es haishi rude." "Oo," madam Herman shwo al stepi bak. "Me mog fasilem krosi gata pa sole, wen semafor-luma es grin."

17

Jon chu USA in yar 1969 dabe gun in Afrika. Es garme in Afrika, e afte lai bak a USA in yar 1979, Jon shwo a swa: "Nau es mucho pyu lenge hir kem bin bifoo ke me go wek. Me sal bay elektre warmiser. Yoshi olo es mucho pyu guy." Pa lai-she dey Jon go a shop dabe kupi elektre warmiser. Vender diki a ta tri o char la do farke sorta, poy shwo: "E sey-la es nuy zuy hao elektre warmiser. It kosti mucho mani, bat it spari haf de yur elektritaa, e elektritaa es muy guy nau, bu ver?" "Ya, it es gro-guy." Jon jawabi, "e se zai fa-buhao kada yar." Ta kan elektre warmiser atentem, dumi duran kelke sekunda, poy shwo: "Wel, me ve pren dwa sey-la, plis, e dan me ve spari ol may elektritaa."

18

Stiv hev shi-un yar e ta-ney brata Tim hev sem la. Li ambi go a same skola e li ambi gro-pri sporta e geim. Li yoshi pri batali, bat ley mata bu joi wen li batali kun otre boys. Kelke dey bak Tim lopi-lai a dom e go uupar a swa-ney shamba. Ta-ney brata toshi es dar, ta zai audi musika. Ta lifti kapa al ke Tim zin e shwo: "Way yu plaki, Tim?" "Bikos Hari he darbi me," ta-ney meno-yash-ney brata shwo. Hari es un boy in skola, e li oftem batali kun mutu. Stiv ridi e shwo: "Ob yu jawabi-darbi, o sim en-plaki kom bebi e lopi a dom a mama?" "Me jawabi-darbi!" Tim shwo ira-nem. "Me jawabi-darbi pa un-ney, e poy ta darbi me."

19

Bili jivi pa kalme gata in gran urba. Koyves ta-ney mata pren ta a parka fo plei, bat wen ela mangi, ta plei pa gata. Undey pa aksham Bili-ney patra dai a ta un jamile nove bol, e pa lai-she sabah Bili go a gata fo plei kun it. Ta plei joi-shem duran kelke minuta, bat poy un gran doga go pas. Al vidi bol. doga toshi en-yao plei kun it. Bili pren bol, lifti it e teni it sobre kapa. Ta bu yao ke doga pren it e lopi wek kun it, bat doga ek-salti e mah-lwo ta. Bili-ney mata tuy chu dom e lopi-lai a ta. "Ob ta he kusi yu?" ela kwesti. "Non, ta bu he kusi me," Bili jawabi, "bat ta gusti me."

20

Sinior e madam Wiliams gami al ke lu hev dwashi-tri yar e ela hev dwashi yar. Afte dwashi-pet yar li hev gran pati, e fotografer lai e zwo kelke foto de li. Poy fotografer dai a madam Wiliams swa-ney nam-karta e shwo: "Li ve bi tayar pa lai-she tridi. Yu mog pai li pa nuy studio." "Non," madam Wiliams shwo, "bi karim sendi li a nu." Fotos arivi afte un wik, bat madam Wiliams bu joi al vidi li. Ela zin (?) swa-ney auto e dukti it a foto-studio. Ela zin it e shwo ira-nem: "Yu he zwo kelke foro de me e may mursha pa bifoo-ney wik, bat me bu sal pagi pur li." "Oo, way non?" fotografer kwesti. "Bikos may mursha aspekti kom maimun," madam Wiliams shwo. "Wel," fotografer jawabi, "es bu es nuy kulpa. Way yu bu he dumi om se bifoo ke yu gami lu?"

21

Un laojen go a hospital. Doktor lai-visiti lu, shwo: "Wel, sinior Jons, yu sal pai kelke inyekta. Afte li yu ve sta mucho pyu hao. Mednana ve lai e dai a yu den un-ney la sedey pa aksham, e yu ve pai dwa-ney-la manya pa sabah." Pa akham un yunge mednana go-lai a sinior-Jons-ney kama, shwo: "Me sal dai a yu den un-ney inyekta, sinior Jons. Wo yu yao pai it?" Laojen fa-astoni. Ta kan nana duran kelke sekunda, poy shwo: "Nulwan gwo lasi me selekti se bifooen. Ob yu verem yao ke me selekti?" "Ya, sinior Jins," nana jawabi. Ela zai hasti. "Wo yu yao pai it?" "We, dan," laojen jawabi al smaili, "me yao pai it pa yur lefte bracha, plis."

22

Pet Hogan safari pa landa bay swa-neyauto. Undey pa aksham ta zai dukti auto along koy kamina al shuki un syao hotel. Ewalaa ta vidi un lojen pa kamina-borda. Ta stopi auto, shwo a laojen: "Me yao go a Surya-Hotel. Ob yu koni it?" "Ya," laojen jawabi. "Me mog diki dao a yu." Ta geti inu Pet-ney autom e li raki it pa sirke dwashi milya. Wen li ateni un syao dom, laojen shwo: "Stopi ba hir." Pet stopi e kan an dom. "Bat se bu es hotel," ta shwo a laojen. "Non," laojen jawabi, "es may dom. E nau me diki a yu den dao a Surya-Hotel: turni ba bak e raki nin milya. Dan leften yu ve vidi Surya-Hotel."

23

Jimi begin rasmi al hev tri yar, e al hev pet yar, ta janmog rasmi ya aika hao. Ta rasmi mucho jamile interes-ney piktura, e jenta pagi mucho pur li. Li shwo: "Sey boy ve bi fama-ney al bi pyu yash-ney, e dan nu ve vendi sey pikturas pur mucho mani." Jimi-ney pikturas farki fon pikturas de oli otre jen, bikos ta neva rasmi pa ol papir. Ta rasmi pa un haf, e dwa-ney la es sempre vakue. "Es ya intele," oli shwo. "Nulwan zwo tak, nulwan krome ta." Undeey koy jen kupi un piktura bay Jimi, poy shwo a ta: "Jimi, bi karim, shwo ba: way yu rasmi pa niche haf de piktura e bu rasmi pa uupare-la? "Bikos me es syao," Jimi shwo. "May brash bu ateni gao."

24

Sinior e madam Grey jivi in gran urba, e li hev un son. Ta nami Pit, e ta bu pri woshi swa. Undey madam Grey shwo a swa-ney mursha: "Tu oltaim jivi in urba, se bu es hao fo Pit." Also pa bifoo-ney saif li findi un syao dom in vilaja e pren Pit adar fo vakasion. Wen li arivi a vilaja, madam Grey sgwo a Pit: "Nu sal resti hir fo dwa wik." Boy lopi inu dom, kan oli shamba, poy lopi bak a mata, shwo: "Me bu vidi banipen, mama. Wo es it?" "Es muy syao dom, Pit," mata shwo. "Hir banipen yok." "Es ya gro-hao!"Pit shwo. "Sey vakasion sal bi verem prival."

25

Undey sinior Parker shwo a swa: "Me bu vidi yo longem, e ta habiti in nove dom nau. Me sal raki-go adar sedey fo visiti lu." Ta pren brata-ney adres, zin auto e en-go. Ta raki-go longem, bat bu findi brata-ney dom. Pa fin ta stopi fo pregi ke koywan helpi ta. "Go rek long sey kamina duran/pa (???) dwa milya," un man shwo, "poy turni a lefta, e poy zin (??) dwa-ney kamina desnen." Sinior Parker raki-go rek along kamina e turni a lefta afte dwa milya, bay poy snova lusi dao. Ta raki-go un milya pyu, vidi un kamina desnen e stopi. Un gina zai go pas, also ta kwesti ela: "Skusi ba, ob se es dwa-ney kamina desnen?"

26

Sinior e madam Wilson jivi in gran jenful urba, e pa un saif li lai a un vilaja fo fai vakasion. Li pri it gro, bikos toy vilaja es kyete klin loko. It gro-farki fon urba. Undey ranem pa sabah li go promeni e miti un laojen. Ta jivi pa ferma e zai sidi ausen bli zindwar sub warme surya. Sinior Wilson kwesti ta: "Ob yu pri jivi in tal kyete loko/' Laojen shwo: "Ya." Sinior Wilson shwo: "Kwo es hao om it?" (??) Laojen jawabi: "Wel, kadawan koni kadawan. Jenta oftem lai visiti me, e me oftem go visiti li. Yoshi ye mucho kinda hir." Sinior Wilson shwo: "Es interes-ney. E kwo es buhao?" Laojen dumi idyen, poy shwo: "Wel, same kosas, pa fakta."

27

Don safari pa landa, e undey ta lai a un hotel in un syao urba. Dar oni servi deyfan fon klok shi-dwa-e-ha til klok un-e-haf. Ta promeni longem, poy vidi un yungo pa gata, shwo a ta: "Skusi ba, ob yu mog shwo kwel klok es?" Yungo kan an swa-ney handakloka, jawabi: "Es klok shi-dwa." Don bu joi al audi se, shwo: "Ob bu es pyu tarde?" Ta fai hunga, ta yao chi deyfan. "Non," yungo shwo. "In nuy urba neva es pyu tarde kem klok shi-dwa." Don fa-astoni, shwo: "Es interes-ney. Kwo yu maini?" "Wel," yungo jawabi, "kadaves afte ke es klok shi-dwa, nu snova begin fon beginsa: klok un, klok dwa..."

28

Sinior Klark gun in ofis e zwo mucho muhim e mushkile gunsa, bat poy ta begin fogeti olo, e por sey luy gunsa fa-mushkile. Undey ta shwo swa: "Me sal go visiti doktor Martin fo toki om se." Ta weiti in weitishamba she doktor Martin, kun otre pasientas tuhun, poy nana shwo a ta: "Na yu mog zin." Sinior Klark hasti zin doktor-Martin-ney ofis, e doktor shwo: "En-sidi ba, inior Klark. Komo me mog helpi yu? / Kwo me mog zwo fo yu? (??)" "Oo, doktor," sinior Klark shwo, "es dashatival. Me bu mog remembi nixa fo pyu kem haf-minuta, e por se may gunsa fa-gro-mushkile. Kwo zwo? Ob yu mog helpi me?" Doktor shwo: "Wen se begin-te, sinior Klark?" "Wen begin-te kwo?" sinior Klark kwesti.

29

Sinior e madam Davi hev un son. Ta nami Bobi, e ta hev-te janmadey kelke dey bak. Pa bifoo-ney semdi madam-Davi-ney lao patra lai fo visiti ela e elay mursha, e ta bringi un prival plei-tren fo Bobi. Al dai it a Bobi, ta shwo: "Skusi, Bobi, me he fogeti om yur janmadey pa bifoo-ney dwadi, also me bu he dai sey dona dan." "Oo, se bu muhimi, opa," Bobi jawabo. "Danke gro!" "E kwanto yar yu hev nau, Bobi?" opa kwesti. Bobi jan jawaba: "Me hev pet yar, opa." "Hao," laojen shwo. "Nau yu es gran boy, Bobi." "Ya, opa," Bobi shwo. "E kwo yu ve zwo al bi pyu yash-ney? opa kwesti. Fo sey kwesta Bobi toshi jan jawaba: "Me ve hev sit yar, opa," ta jawabi.

30

Dik es maryuan pa un gran ship. It navigi-go a Nipon e Ostralia, also Dik oftem resti pa ship duran kelke mes pa ves. Al en-jagi pa sabah, ta sempre vidi mar, o koyves koy portu. Al hev dwashi-tri yar Dik gami e kupi un syao dom kun garden in suy-molya-ney urba. Toy urba es dale fon mar. Poy ta go a swa-ney ship e bu lai bak duran dwa mes. Fon portu ta go a urba bay bus e gro-joi por vidi molya snova. Pa lai-she sabah ta somni til klok nin. Poy ta en-jagi turan e ek-kan tra winda. Traen winda ye kelke baum. Ta en-fobi gro e ek-salti al krai: "Nu he darbi landa!"

Personal tools
Namespaces
Variants
Actions
naviga
Linka
Proposi
Toolbox